Вахара хьалаш дика цахиларах, вайна юкъе ба новкъостал эшаш бола нах. Таро йоацараш а дукха нийслу шахьарашка, юрташка. Цхьайолча хана гаргара саг хала лазар долаш, могаш воацаш хул.

Вай лораша яхачох, хала лазараш долча берий хьал (берий церебральни паралич) – ДЦП, аутизм, кхыдараш) даим дегӀадоагӀаш да.

Лакхехьа белгалдаьча лазараша из бер лерттӀа дегӀадайтац, къамаьл хьаде ховш а хилац. Вай доккха да, вай таро я кӀеззига мукъагӀа царна новкъостал де, хӀана аьлча шоаш мел йоаккхача хана, могашал яйна хургба уж.

ГӀалгӀайчен дикача гӀулакхий ганза каст-каста цу наха новкъостал ду. «КӀаьда дегаш» яхача проекта чуйоагӀаш, дукха мах беха молхаш, заӀапхой могашал тоаяра дола технически (ТСР) хьалаш эц царна, иштта операци е езача наха хьалхара ахча лу.

Белгалдаккха дезаш да, из гӀулакх хьаллоацаш, новкъостал даьд боккхагӀчарех 410 сага, 2227 бера, цхьан моттигера из гӀо даь хилар теркалдича, дика новкъостал да из.

Ганза кулгалхочо Матенаькъан Натас яхачох, царна даь новкъостал да 166 млн 566 эзар сом мах болаш.

Иштта къахьегарца, юкъарлон доакъашхоша хьайийллар Магасера «Чайка» яха дегӀ дӀалелалуш доацача берий могашал меттаоттаяра центр.

Цхьаькха лоархӀаме гӀа ба, ГӀалгӀайчен бахархой могашал тоаяра болх шоаш дӀахьош хиларах тарра, Россе хьалхале лелаеча лорий центраца цар бувзам лелабеш хилар. Эшача оарцагӀбоал унахочун лаьрхӀа ахча гулдара, хӀана аьлча мехкахой новкъостал чӀоагӀа накъадоалаш да могашал яйнача сага.

Могашал меттаоттаеш йолча центре салоӀама хьалаш а вӀашагӀдехк. ДукхагӀча даькъе ашараш, сурташ дехкар, спортаца дувзаденна хьал дӀадахьар да цига чудоагӀаш, цу дерригне а новкъостал ду могашал яйнача сага дӀахо ваха безам хулийташ. Къаьстта из бахьан долаш, дикача гӀулакхий Клубо гулбу шоаш тӀахьожам лоаттабеш бола нах тайп-тайпарча викторинашка, цӀий дӀадалара йолча лекцешка, кулгаговзала болх беча, кхыча моттигашка дакъа лаца.

15-20 шу хьалха, лохера е лакхера дегӀ лелаш доаца лазар вӀалла а дарба де йиш йоацарех лоархӀаш дар. Ираза, ханаш хувцалуш йоагӀа. Вай хана кхетаду, саг цу гӀулакха бехке ве а ца гӀерташ, догьийккха а ца лелаш, ше лаьрхӀачунга кхача везилга.

Цунна дола масал да Йовлой Лиза. ДӀа-хьа доалача лазарах дукха ха я из лелаш йоаца, из бахьан долаш вордингашка ягӀа из. Иштта дале а, Лиза духьалъотталуш я ший дегӀацарча хьала, из наха дика йовзаш йола блогер я.

Цул совгӀа, цо хьайийллар «Кхыча беса хьажар» яха дешара центр, цу даькъ тӀа берашта Ӏомабу мотт, таджвид, жӀакаш.

Иразе вахар хоттаденна, ше нана йолаш хиларо низ чубоссабир цунна, таханарча вахара хьалашка дог делаш яха.

Геттара тӀехъяьнна дикагӀа йола телефон хӀана яц сога, яхаш, цхьабараш багӀача хана, цунна гаьна боацаш ба шоай унзара лазар кхийтта бер мишта дерзадергдар-хьогӀ яхараш. Берригаш а могаш, ираз долаш хилба. КӀеззига мукъагӀа новкъостал де таро яле, юхегӀолла тӀех ма довла таро йоацача цхьанна а сага.