Матенаькъан Дали, Ницца-Шахьарера юкъера ишкол яьккхачул тӀехьагӀа, 2015-ча шера деша яхар «Юкъара, доалахьара бокъо/ мах бара бокъо» яха балха говзал Ӏомае Ниццерча Cийнача берда Университета юридически факультете. Кхаь шера дийшачул тӀехьагӀа, 2018-ча шера лиценциата даржера экзамен дӀа а енна, Дали дӀахо дешаш яр шин шера магистра программах «Магистр- бехктокхаме гӀулакх», лакхара дешар дийша яьнначул тӀехьагӀа, 2020 шера из деша отт балха говзал лакхъяра Ницца-Шахьаре «Граждански бокъо, граждански процесс» яха говзал караерзае дагахьа суда тохкамий университета чуйоагӀаш йолча институте.

Дешарца цхьана, Дали болх беш хул Ӏомалу юрист йолаш ПАРДО адвокатий бюро, 2018-ча шера денз 2022 шерга кхаччалца, цига цо юкъара балха дешаш Ӏомаду. Адвокаташ кийчбу моттигера институт яьккхачул тӀехьагӀа (2021 ш.), иштта тӀехдика экзаменаш дӀа а енна, Дале хьаэц (САРА) адвокатий балха могаеш хилара тешал, из цунна хьаделар Марсела къулбехьен-малхбоален адвокатий ишколе. Цо ший къахьегама никъ дӀаболабу Тулон шахьара Суда трибунала 2-ча Граждански палата юрист йолаш. 2003-ча шера, адвоката болх лелабе бокъо енначул тӀехьагӀа, Дали йолалу адвоката-Ӏомалучун ПАРДО адвокатски бюро болх бе. Адвокатски бюрорча балха новкъосташа лакха мах оттабир Дале хьаькъалца гӀулакхаш леладара, из иштта нахаца Ӏимерза яр ше болх беш хиннача цу ялх бетта.

2024 шера Матенаькъан Дале Ницца-Шахьаре ший доалахьара адвокатий бюро хьайийллар, ше адвокат а йолаш, граждански бокъонах (дезалера бокъо, доалахьарча хӀаман бокъо, декхараш, бартчӀоагӀамаш, сага човнаш яр, меттаоттадар), гӀулакхерча бокъонах, кхыча паччахьалкхен наьха бокъонах нахаца болх беш. Белгалде деза, Дали ший наьнаца зӀамига йолаш ера Франце, цунна цу хана французий меттала цхьа дош а хацар. Дале нанас Матенаькъан Мухтара Тамарас шин йоӀа, воӀа ший мел йола ха дӀаелар, уж кхебеш, дешийташ, гӀалгӀай Ӏадаташ лорадеш, шоай мохк безаш бола нах царех беш.

Тахан Дали дийша яьнна, каьхат дола адвокат я. Ший балха тӀа цунна накъадоал французий мотт дика ховш хилар, цу меттала, цхьаккха шеко йоацаш, дика къамаьл ду цо, цун иштта хов гӀалгӀай, испански метташ. Матенаькъан Дали даим къахьегаш хьайоагӀа ший профессиональни балха говзал лакхъеш, цо таро лу цунна шийна тӀаухача наьха тайп-тайпарча хаттарашта нийса жоп дала, моллагӀа дола гӀулакх къоастаде.

Дале яхачох, «… Иштта ховш хила деза, нийса таржам дарах тийша долга дукха хӀама, цудухьа эрсий метта оалар французий меттала даккхар лоархӀаме да. Цу моттигашка шаккхе а оагӀув кхетаеш хила еза, сона адвокат хиларах тарра, суде воагӀача сага бокъонаш лораяра из эшаш да. Франце дика деша а балха отта а таро я массане а, бакъда из нийса лелае еза. Цу гӀулакха хьай мел дола хьинар дӀалуш хила веза, хье вахача мехкара хьал дикагӀа довзара».

Дале ший никъ дика дӀахьу, ший дагалаьттар кхоачаш а деш. Из чуйоагӀаш хургья ГӀалгӀайчен доазол арахьарча кагирхой дошоча ганза.