Орджоникидзевски станице ваьвар Келаматанаькъан ӏалихан. Къаман юкъе дика цӏи йоаккхаш хиннача беркатеча дезале кхийра ший мехка доккхача дикашца накъаваргвола майра воӏ. Бера хана денз; къаман ӏадатий, исторе, культуран лоархӏам бе безилга, Даьхе массахана боча хила езилга хьалхадоахаш, кхийра из. Эггара халагӏа ханаш латтача хана, бера хана денз безарашта юкъе йиа безаме ха дагаухаш, дега тоам бора цо.

Эскаре амал деш яьккха ха бокъонца долча къонахчала гӏулакхаш дегӏаца, сица чӏоагӏдеш хилар ӏалихана. Ший декхар кхоачашдаь, цӏенах кхийттачул тӏехьагӏа, Гӏалгӏайчен юкъарлен-политически вахаре дакъа лоацаш, РФ юкъе вай республика чӏоагӏъяра тӏехьа къахьегаш, лаьттар из.

Терроризм яхача бӏехача, доккхача зулама духьала къовсам лоаттабарца, хала декхар дар цо шийна хьатӏаийцар. Кхераме йолча, йоккхача операцешта юкъе дакъа лаца дезаш хилар дуккхаза. Нах маьршача, цхьаккха хӏамах кхера ца безача вахарга бига гӏерташ, дукха къахьийгар цо, ший са ца кходеш. Гӏалгӏай къаман вахаре, Россе исторе цӏаккха вицлургвоаца воӏ ва Келаматанаькъан Макшарипа ӏалихан! Дуккхача адама масал долаш ваьхар из, нах паргӏатонга кхоачабе гӏертар ди, бийса ца къовсаш къахьегаш.

2007-ча шера тов бетта 17-ча дийнахьа бӏеха зуламхой тӏакхайда; вахар хаьдар дог майра, эздий хиннача къонахчун. Бӏаь совгӏа поатрон яр цун машина техар, хӏаьта эпсара ший дегӏа 15 пхо кхийттабар. Дерригача къаман боккха эшам бар иштта вола воӏ дӏакъастар, дерригача адама боарам боацаш доккха халахетар хилар цох! РФ Президента амарца Россе Турпал яха цӏи чӏоагӏйир цун тӏехьа.

«Дошо Седкъа» яха майдилг цун дезалга: цӏен-наьнага, воӏага - дӏаелар. Келаматанаькъан ӏалихана цӏи дӏаязъяь латт Самарски паччахьалкхен университетерча, цо дийшача Шолжа-Шахьарерча ишколан, Россе ФСБ Москверча моттига мемориальни улгаш тӏа. Из деша ваьгӏача Самаре цун цӏерах бульвар хьайийллай. Вовзаш хиннарашта цӏаккха а вицлургварех вацар ӏалихан. Воккха, лакха начӏал дола эпсар хиларал совгӏа, кхыдолча гӏулакхашта тӏехьа а дикка белгала волаш ваьхар из.

Массадолча хӏаман ка йоалаш, исторецара кхетам лакха болаш, дукха хӏама ховш, спортаца бувзам лоаттабеш саг вар из. Тайп-тайпарча оагӏон майдилгаш, Денала орден луш белгалбир цун болх, Росси ФСБ кулгалхочо бехктокхаме къахьегарах доккха баркал кхайкадир цунна, террористашта духьаларча операцешка дакъа лоацаш хилар из.

Шозза, цкъа 2006-ча шера, тӏаккха 2007-ча шера Къилбаседа Кавказерча моттигашка лаьрххӏа дола декхараш кхоачашдарах Денала Орден яла оттавир къамах дог лазаш, адамашта юкъера зулам хоададе гӏийрта из денал визза хинна эпсар.