Туризма дегӀаахар
ТӀехьарча кхаь шера 20 эзарнел дукхагӀа хиннаб керда туристаш
«Туризми хьаьша тӀаэцари» яхача къаман проектах дийцар республике. Мехкадаь зарбан болх лелабераша белгалдечох, укх тӀехьарча кхаь шера вай республике тӀалатташ бола туристаш 20 эзар совгӀа дукхагӀа хиннаб. 2022-ча шера 105 эзар саг венав мехка, лурчӀога баьхкараш 124,9 эзарне тӀа латт. Цу гӀулакха юкъе керттера моттиг дӀалоацаш да истореца ювзаеннача моттигашта тӀабодаш бола керда 44 никъ тоабеш къахьегар.
Масала, ЖӀайрахье керда ши никъ ба, Пхьилекъонгий-Юрта БоргӀа-Каша тӀабодаш бола никъ тоабаьб. Иштта тоаеш латт туристаш лелаш йола еррига моттигаш. ДӀадахача шера ЖӀайрахье, «ЖӀайрахь» яхача хьаьший тӀаийбеча цӀагӀа, «Ӏарамхи» яхача курорте 13 керда моттиг хьайийллар. Тайп-тайпара кхетаченаш я мехка дӀакхухьаш - «Дезала тоаба», «Тур», «Фусам нана», дикка тӀаоз цар а туристаш.
«ГӀалгӀай мехка туризм керда, хӀара денна тоадеш, доаржадеш латташ дола гӀулакх да. Вай декхар - цу оагӀонца дувзаденнараш боаггӀача боараме хилийтар, ма хулла дукхагӀа туристаш тӀалаттаргбола наькъаш хьаделлар», - аьлар вай Мехкадас Келаматанаькъан Махьмуд-Ӏаьлас.
Къаман проекта хьакъоастадаь рузкъа 317 млн совгӀа да, цу юкъера 313 млн совгӀа федеральни оагӀонгара да, 3 млн гаргга - моттигера. Цу рузкъанца туризм дикка тоае, туристаш дукхагӀа тӀаоза аьттув баргба вай.
