Халкъашта юкъера заӏапхой Ди лоархӏаме хиларах дийцар вай Мехкадас
Халкъашта юкъерча заӏапхой Денца дувзаденна, бахархошка къамаьл дир вай Мехкадас Келаматанаькъан Махьмуд-ӏаьлас. Дегӏа могашал эшаеннарашта терко е езилга хьалхадаккхарал совгӏа, наха юкъе цхьацца моттигаш хьалаьца уж хилар лоархӏаме долга белгалдир цо. Республикан кулгалхочо белгалдир, дегӏа могашал эшаенна нах тахан дуккханешта масал гойташ болга. Паччахьалкхено гӏо деш, тӏатеӏӏа шоаш къахьегаш, мехка культуран, экономикан, кхоллама оагӏонашца шоай начӏал гойташ ба уж.
«Дуккхача заӏапхоша керда говзалаш караерзаю, шоай цхьацца хӏама хьаделл, спортаца бувзам лоаттабеш, тайп-тайпарча моттигашка белгалбоалаш хьабоагӏа, дезалаш ураувттабу», - теркалдир Макшарипа Махьмуд-ӏаьлас.
Белгалде деза, заӏапхошта гӏо деш, уж хьаллоацаш вай мехка йоаржаяь проекташ йолга. Къаьстта лоархӏаме моттиг дӏалоацаш да цу юкъе спортаца, дешарца, кхолламца дувзаденнараш. «Шоай оагӏув хьаллоацилга, шоашта гӏо де кийча болга ховш хила беза уж нах. Вайна массанена лоархӏаме да царна новкъостал деш хилар», - тӏатехар вай мехкадас.
