Дола-Коарча культуран Цӏагӏа «Маьтсела беттара ашараш» яха сахьат дӏадихьар, цига гулбелар юртара бахархой, бӏаьстен, къахьегама цӏай дезде. Кхетаче геттара безаме хилар.

Программа дӏайолайир истори довзийташ. Гулбеннарашта хьалхадаьккхар маьтсела бетта Цхьоалагӏа ди дездар мичахьара хьадоагӏа, мишта дӏадоладелар сага къахьегам безбара ди, бӏаьстен белгалон ди мишта хилар, укх итташ долча шерашка мишта хувцалуш хьадоагӏа из ди дездара хьал.

Ашарий оагӏоно зал хьалйизар бӏаьстен лерхӏамца, цӏай хиларах хӏара сага дегаондо луш. Доакъашхоша безамца гойтар шоаш кийчъяь программа, цу юкъе викторина, яхьаш а дӏахьош, цхьадолча хаттарашта жоп луш.

Цу кхетачено хьалхадаьккхар гулбеннарашта мел лоархӏаме да къаман ӏадаташ лорадар, бӏаьсти иллешца тӏаэцар.

Шолжерча культуран Цӏагӏа цу дийнахьа ший тайпара безаме кхетаче дӏайихьар. Цигарча тоабо кийчйир дика программа, цо вӏаший дийзар таханардар, мах бола даьй ӏадаташ.

ДК чувоаллача го йиш яр кулгкара хьаяьча говзамеча хӏамай гойтам, хьажара зале дар цу ден керттера маӏан - «Маьлха Аза» яха мехкарашта юкъера яхь. Къона доакъашхой дакъа лоацаш бар кхаь даькъ тӏа, цар гойтар шоашта мишта довз гӏалгӏай къаман гӏулакхаш, халкъа бегаш, даар кийчдара начӏал.

«Мехкарий къовсамаш» яхача даькъ тӏа шоаш хьабаьнна овла бовзар, къаман ловцаш дахар ха дезаш дар. Цу юкъе дар «Сакъердаме дувцараш», «Гӏалгӏай шу оттадар» яхачаа даькъ тӏа доакъашхоша гойтар истол оттадар, къаман даараш кийчдара говзал.

Цу яхье доккха дакъа дӏалоацаш яр Гӏажарий-Юртарча №2 йолча юкъерча ишкола 6-ча класса дешархо Балайнаькъан Рабия. Цо цецбаьхар гулбеннараш, ший 17-ча даьгара хьа мел волчун цӏераш яха харах. Цхьа барт болаш Рабияйна хьалхара моттиг елар. Сий дола шоллагӏа моттиг кхаьчар цунца цхьан классе яьгӏача Бохтаранаькъан Паьтӏамата, кхоалагӏа моттиг яьккхар Гӏажарий-Юртарча №3 йолча ишкола 6-ча класса дешархочо Чаненаькъан Аминас. Котбаьннарашта дагалоаттама совгӏаташ делар.

Цӏай хилара кеп хьаллоацаш бар сцена тӏара говзанчаш а. Шоай дикагӏа дола иллеш аьлар цар хьажа баьхкарашта. Дезаделар наха Китенаькъан Жаннас, Барханой Заьлмахас даьха иллеш, иштта къаман халхарца берригаш гӏадбигар Мержой Любас кулгалдеш хиннача «Эздий» яхача берий халхара тоабо.

Цига иштта дакъа лоацаш хилар Алхастерча культуран Цӏен кхоллама тоаба, шийна керте Гӏалгӏайчен культуран болхло Боканаькъан Заретхан йолаш.

Эггара чам болча тайпара, ӏадаташца чакхдаьлар цӏай-чай малар. Боккхагӏий а зӏамагӏий а чам баккха таро йолаш бар къаман даарех.

Маьсела бетта Цхьоалагӏа ди - из да дукхача шерашка хьакхоллара белгало йолаш, къахьегама сагаца лерхӏам болаш, барт-цхьоагӏон цӏай. Цох дийцар Гӏажарий-Юртарча культуран Цӏагӏа.

ДК болхлоша кийчъяь цӏайна программа йицлургйоацаш хилар. Концерт сийрда дар; цул совгӏа, вай цӏагӏа кийчдеча тайпара, хоза кийчо яь а дар. Хӏара сага хьамсара йола ашараш яр сцена тӏара хьахозаш.

Къаьстта йола терко йир гулбеннараша иллиалархой кружока доакъашхоша гойтача программанна.

Шоай хьехамчаша Ӏоахилганаькъан Хадизас, Эльгакаева Седас кулгал деш, къонача иллиалархоша тайп-тайпарча жанра композицеш гойтар. Укхаза хозаш дар наха дукхагӏа деза иллеш, ашараш, иштта халхараш дир. Царех дар «Гӏалгӏай бегий илли», лирически иллеш «Кхо дагалаттар», «Лов сона», «Говр», «Ма вохалахь». Даьхенцара безам совбоаккхаш дола «Эпсараш» яха илли а даьккхар.

Царех хӏара моттиг, тӏоараш детташ, тӏаэцар. Эггара чӏоагӏагӏа тӏаийцарех дар «Са Даьхе» яха илли. Из гулбеннараша ший тайпара дега хоза хеташ тӏаийцар, цо вӏашагӏтехар берригаш, Даьхенцара безам совбоаккхаш из хиларах.