«Конгресса доакъашхоша дувц таханарча дунен тӀа туризм дегӀаяра хьалах, иштта мехка туризм дегӀаахара йолча таронех, цу юкъе СНГ мехкашца лелабеш бола бувзам чӀоагӀбарах. Цар терко тӀайохийт экологически чӀоагӀо йолча туризманна, баьццара технологеш юкъеяхара, Ӏалама таронаш лораяра, хӀаьта Россена, Беларуссена юкъера бувзам туризма даькъ тӀа чӀоагӀбара, цхьана проекташ хьакхоллара.

Цига иштта дийцар культуран, исторе тӀехьален дакъа вӀашагӀдоллара экскурси дӀахьош бараша бе безача балхах, из дӀабахьа беза таханарча ден керда таронаш юкъеяхарца, хулаш долча хувцамашка хьежжа», - аьлар «Сердало» газетага ГӏалгӀай паччахьалкхен университете.

Конгресса доакъашхоша теркал ца деш дутаргдац туристически даькъ тӀа бе безача балха хьал а, цунна юкъедоагӀаш да дешар, балха тӀа лакхвалара таронаш, говзанчаш дегӀаахар, иштта хьожаргба таьрахьий технологеш дегӀаахарга туристически даькъ тӀа, хьалаш тоадара лаьрхӀа йола керда технологеш юкъеяхарга.

Юрта туризм дегӀайоалаяр, мехка а бахача моттигера а экономика юкъе цо ший дакъа лацар конгресса керттерча темаех цаӀ яр. Из тема теркама юкъе хилар кхетаде хала дац, хӀана аьлча, юртара туризм юрта доазонаш дегӀадоаладара, экономика чӀоагӀъяра лоархӀамечарех я. Цу юкъейоагӀаш я тайп-тайпара оагӀонаш: агротуризм, экотуризм, этнографе, хиннача хӀаман туризм - цо таро хулийтаргья культуран тӀехьале лорае, балха моттигаш хилийта, юртахошта хьатӀабоагӀаш бола пайда лакхбе.

Юртара туризм дегӀайоалаяра лоархӀаме да Ӏаьдалца, юкъарлон болхлошца, бизнесаца айхха бувзам лелабеш хилар. Цу тайпара бувзам лелабаро белгалъю дӀахо дӀахьоргйола Россе туризм.

Конгрессо белгалдир, мехкий экономика чӀоагӀъяра туризмо дӀалоацаш дола дакъа. Цу даькъ тӀа дегӀадоагӀаш хиларо таро хулийт инвестицеш юкъеяха, наьха вахара хьалаш тоаде. Туризм хиларах, балха моттигаш а хьакхолл, къаьстта хьаьший цӀенош; ресторанаш хьалъярца, балха хьалаш лоаттадарца, транспортаца дувзаденнараш. Масалаш дукха да, гаьна ваха а везац, теркалде деза ГӏалгӀай мехка юххьанца туризм хьакхоллаш хинна таронаш мишта яр, цул тӀехьагӀа хувцаденнар. Из ба цох хьабоала пайда.

Туристически даькъ тӀа инвестицеш юкъеяхара хьалхарча аргӀагӀа эшар да бизнес дегӀаяра дика хьалаш, Ӏаьдала балха тӀа нийслуш йола халонаш юстаръяхар, йоал яккхара даькъ тӀа паргӀато хилийтар. Иштта лоархӀаме да туризма гӀишлош дегӀайоалаяр, керда хьаьший цӀенош, ресторанаш хьалъяр, лоацца аьлча, еррига туристически таронаш керда технологеш юкъеяхарца дегӀайоалаяр, уж хьалаш хувцар. Юха а белгалду, укхаза ГӏалгӀайчен дика пайда бахьаш йола моттигаш я, уж я моттигера мах бола культуран исторе оагӀонаш.

Конгресса чудоагӀаш, цун доакъашхоша дийцар Кавказе туризм дегӀайоалаяра дош, цар керттера терко тӀайохийтаргья керда наькъаш хьаделлара, туристашта лаьрхӀа дола хьалаш тоадара, кхыча паччахьалкхен туристаш тӀаозара. Кавказе гӀолла «Gran TurӀsmo» баь боккха никъ - иштта вӀашагӀъелла я конгресса кертерча темаех цаӀ.

Кавказ - из да мах бола культуран тӀехьале, тамашийна Ӏалама хозале, исторически дагалоаттама моттигаш йола доазув. Бакъда Россе Къулбехьен туризм дика дегӀаяра эшар да транспортаца кхоачам хилар, хьалаш дика хилар, хоамий оагӀон болх тоабар.

ГӏалгӀайче тахан таронаш я туристически оагӀув дегӀайоалае. Иштта дале а, вайна эшар да кхыча мехкий балха говзал хьаэцар, цар туризм дика дегӀаяр сенца дувзаденнад ховш хилар, цул тӀехьагӀа цу дерригне мах оттабарца воай де дезар белгалдар.

«Хургдолчун туризм-туризма хургдар» яхача студентий конгрессо дӀайолаю Россе а СНГ а мехкашка туризм дегӀайоалаяра студентий проекта халкъашта юкъера яхь. Де дезар да, ГӏалгӀайче цунна теркам тӀабохийташ, республикан даькъ тӀара туризм дегӀайоалаяра кердадараш юкъедоахаш хилар.