Вай мехка, Россе паччахьалкхен гӀулакха бехктокхаме къахьегаш, вахара оагӀонца, бокъонашца дувзаденнараш тохкаш, цу оагӀонцара начӀал лакхдеш хьабена никъ ба из. Халкъа Гуллама депутаташа хӀара денна беча балхах, царна тӀалаттача декхарех дувцаргда вай тахан. Парламента 30 шу дизар, дерригача къаман цӀай да! Къамо хержача наха кхоачашде деза декхараш хӀара шера дукхагӀа хул, дӀабахьа беза болх а боккхагӀа ба. Мехкадаьца Келаматанаькъан Махьмуд-Ӏаьлаца, паччахьалкхенца, Пччахьалкхен Думан депутаташца, РФ сенаторашца, хьакимашца, бизнесменашца бувзам лоаттабеш, цхьана хьабахьаш болх ба из. ЧӀоагӀа лоархӀаме да бахархой уйла, нигат довзаш, цар лерхӀамаш теркалдеш хилар, царца кхетачеш дӀакхахьар.

Могаш дола гӀо де хьожаш я тахан парламент тӀема доакъашхошта, цар дезалашта. Даьхен гӀулакха латтарашта новкъостал дохьийтача доккха дакъа лоац цо. Цул совгӀа, тӀема юкъе вахар хаьдарий цӀагӀара нах болча ухаш, низ дӀа ма кхоачча цар дегаш теде хьожаш, гӀо деш болх лелабу. Республикерча бокъонех йола проекташ тохкаш, могаш боацача наха, берашта гӀо деш йолча моттигий оагӀув хьаллоацаш, унахошта эшаш дар эцаш, новкъостал лоаттаду.

Палестинерча вахара хьал телхача наха гӀо деча; Луганске, Донбассе эшаш йола хӀамаш йохьийтача доккха дакъа лаьцад парламента доакъашхоша. Мехкарча телевидене дӀакхухьача передачашка дакъа лоацаш, бахархошта къувлаш мел долча хаттарашта жоп луш, бувзам лоаттабу депутаташа. Цу юкъедолх хоржама комиссеца, цӀерацарча хатарца, архивни гӀулакхаца, квартирни цӀенош тоадеш дӀахьоча балхаца, юртбоахама гӀулакхаца, иштта кхыдолча оагӀонашца дувзаденна хаттараш. Дешара оагӀон хьал таханарча хано дӀадеххача тайпара хилийтара тӀехьа, вахара политикаца дувзаденнараш тоадеш, керда гӀишлош хьалъяра тӀехьа доккха дакъа лоацаш къахьег парламента. ЦӀихезача спортсменашца кхетачеш дӀакхухьаш, вай мехкара спорта хьал тоадара тӀехьа боккха болх бу цар.

Партийни проекташка гӀолла хьалъяь тайп-тайпара гӀишлош хьаеллача дакъа лоац, халача хьале боахкарашта, боккхача дезалашта новкъостал лоаттаде хьож депутаташ. Вай республикерча балха моттигаша шоаш дӀабихьача къахьегамах дувцача кхетачешка, деррига боаггӀача боараме дӀанийсдеш, тоадара тӀахьехаш хьабоагӀа. Парламента тахан дӀахьош болча балха юкъера цхьа доккха доаца дакъа мара дац хӀанз вай дувцар, ма дарра аьлча, цар дӀахьош латтар кхы а доккхагӀа дукъ да. Майрра ала йиш йолаш да вай; цар шоай болх бехктокхаме дӀахьу, аьнна. ГӀалгӀайчен вахара хьал тоадергдараш юкъекхувлаш, кердадараш кхоллаш хьайоагӀа парламент. Федеральни бокъонех йола проекташ тохкаш, шоашкара кердадараш юкъедоаладеш, мехка экологически хьал лорадеш, юртбоахама гӀулакх ма могга тоаде хьожаш, вай къаман мотт лорабара, боаржабара тӀехьа къахьегаш боккха болх лелабу Парламента.

Халкъа Гуллама дукхагӀа бола доакъашхой республикерча тайп-тайпарча моттигашка хьинаре къахьегаш хьабаьхкарех ба. Юридически оагӀонца, хӀама хьакхоллаш йолча моттигашка, юртбоахаме, юкъара балхаш леладеча, иштта кхыйолча бе-беча моттигашка къахьегаш цар Ӏоаяь поалхам тахан Парламента вахаре накъаяьннай царна. Дуккха гуш, тохкаш, кхоачашдеш Ӏоадаьчо, тахан доккха гӀо ду царна респбликера лоархӀаме хаттараш доашхаш, нийсагӀдар хьахоржаш. Республике бахаш болча тайп-тайпарча къамий наха юкъе барт, бувзам хургболаш, вӀаший новкъостал лоаттадеш бахара уж тӀахьехаш, къахьег депутаташа. Карарча хана, тайп-тайпара профильни комитеташ я, Халкъа Гулламе болх беш. Царна юкъе я бокъонехи паччахьалкхен гӀишлой балхехи йола, дукха лоархӀамедараш шийна чулоаца комитет.

Бокъонаш хьакхоллар, бахархоша, балха моттигаша тӀадена хаттараш тахкар, парламентски кхетаченаш вӀашагӀйохкар, бокъонаш лораяра тӀехьа тӀахьожам лоаттабар - из деррига цунна чудодаш да. Иштта ший оагӀон хьал тоадеш, къахьегаш, хьайоагӀа унахцӀенон гӀулакхахи вахара политикахи йола комитет; ахархой политикахи, Ӏалама гӀулакхахи йола комитет; къаман политикахи бахархошцарча дин оагӀонцарча бувзамахи йола комитет; йоалахи ахчахи йола комитет; экономически политиках йола комитет; дешара оагӀонах йола комитет; культуран гӀулакхехи хоамий политикахи йола комитет.

Укх шера парламента депутаташта , бахархошта хьалхашка лоархӀаме политически декхараш латт - РФ Президент харжар, ГӀалгӀай республикан кулгалхо харжар. РФ кхоане, вай къаман кхоане чулоацаш дола лоархӀаме гӀулакхаш да уж. Иштта дукха, боккха болх ба вай мехкара вахара-экономически хьал тоадеш дӀабахьа безар. Хьалкхувш латта тӀехье мехках дог лазаш, накъайоалаш, лоархӀаме дакъа къаман вахаре дӀалоацаш хургйолаш кхеяр, нийсача, беркатеча наькъ тӀа яьнна, дӀахо яха цунна новкъостал дар, мехка эшаш бола говзанчаш кийчбар, иштта кхыдараш а дукха да хьалхашка латтараш. ХӀара хана ший бокъонаш я, таханарча хано дӀадеххача тайпара хила деза вай вахар а. Бахархошца бувзам лоаттабеш хилар чӀоагӀа лоархӀаме да, из хьал тоадара тӀехьа. Истола юхе вагӀаш дола кабинетера вахар дита, наха юкъебаьнна, царца кхетаченаш дӀакхухьаш, бахархошта дагалаттар, къувлар фуд тохкаш, цар хьашташ кхоачашдара тӀехьа къахьегаш лел тахан депутаташ.

ХӀаьта наха тахан зув из, доккха баркал оал, хам бу! Халкъа Гуллама депутата гӀанд мичча хана хьалоацаргдолча сага а дика масал, хьокхам ба из. Эггара хьалхарча аргӀагӀа кхоачашде дезараш, лоархӀаме декхараш белгалдир вай Парламента спикер волча ТӀумхой Мухьмада, РФ Президента Федеральни Гулламга дахьийтача къамаьлах дувцаш. Цо теркалдир, Паччахьалкхен Президента къамаьл кхоанарча вахара гӀулакхаш чулоацаш, лоархӀам болаш, дӀахо дӀабахьа беза боккха болх белгалбеш да, аьнна. Керттердараш - РФ дезалашта новкъостал дар, экономически хьалаца дувзаденнараш тоадар, керда къаман проекташ, дешара оагӀонцара кхоачамбоацараш тоадар, тӀема доакъашхошта, цар дезалашта гӀо дар, мехкара кхерамзлен хьал тоадар.

Президента, керттердарех да аьнна, белгалдаьраш вай республика чулоацаш да. Мехка керте латтача сага тӀадехка декхараш кхоачашдеш дӀабахьа безар, боккха къахьегам эшаш, лоархӀаме болх ба». Цхьаккха шеко йоацаш, респбликера еррига балха моттигаш, юкъара моттигаш, хӀара мехкара вахархо отта веза уж декхараш кхоачашдара тӀехьа къахьега. Ишттача наькъаца мара лакхача толамашка кхоачалургдац вай! ХӀаьта оаха, «Сердало» газета тоабо боккхача безамца даькъалабувц Халкъа Гуллама депутаташ , беррига бахархой 30 шера хьинаре, бехктокхаме къахьегарца. Машар, барт латталба массахана вай мехка, ерригача Россе. Иразе дахалда вай дерригаш!