Цхьа бӀаь гаргга медиаболхло гулвелар цига, Россе тайп-тайпарча моттигашкара, шоай профессиональни говзал лакхъяра, хьалхале лелаеча мехка кхелахоша луча говзанча хьехамашка ладувгӏа. Массаза санна, машуканаькъана бийхар шоай балха даькъ тӀа дикагӀа бола нах.

Мархенаькъан Анзор, ГӏалгӀай Республикан Кулгалхочун Паччахьалкхен Администраце кулгалхо ва. 

Моаршал хоаттача дешаца дӀадоладир ший къамаьл ГӏалгӀайчен кулгалхочун Келаматанаькъан Махьмуд-Ӏаьлий цӀерагӀа ГӏалгӀай Республикан Кулгалхочун, Паччахьалкхен администраце кулгалхочо Мархенаькъан Анзора. ЛаьрххӀа йолча проекта кулгалхочо, «Машук» дешара Центра АНО керте латтача Мазяков Евгене иштта моаршал хаьттар гуллам хьабеллаш, болх беркате бувцаш.

Канавцев Михаил, «Сенеж» яхача медиадешара проректор ва.

Хьалхара ах ди хетадаь дар «МедиамаӀан дола архитектура» яхача семинара, иштта Канавцев Михаилагара «Наха терко яра хьал леладар» яхача говзанча хьехама. Цун къамаьл гулбеннарий терко чӀоагӀа тӀаозаш дар.

«Ер са кхоалагӀа кхетаче я, массаза санна дика дӀа а йихьар. Деррига а дика дар, из хилар вай лоамашка. Хьаьший дика нах бар. Дукха дар кердача тайпара кхетадайтараш Канавцева лекцешка», - аьлар шийна хетар дувцаш Лаьнанаькъан Райшата.

Доакъашхой иштта хилар Каралинайгарча «Юртбоахама блогерча» лекцега ладувгӏаш. Цо дийцар пайда баргболаш болх мишта бе беза нахаца, иштта подписчикаш юхасовцабара де дезар белгалдир.

Каролина.

«Ер кхетаче сона шоллагӀа я, со юха а йода укхазара кердача, дикача поалхама гӀирсех хьалйиза. Къаьстта мах оттабу аз, хӀара къамаьла духьала теори хинна Ӏацар, боккъал бола пайда бар балха юкъебаккха йиш йолаш, кхычарга кхачийта а таро йолаш. ЧӏоаггӀа баркал оал аз ер къамаьл вӏаштӏехьадаьккхачоа, укх тайпара ер хьал хьакхелларашта, укхаза Ӏомалу, дегӀайоагӀа», - аьлар цига доакъашхо хиннача Малсаганаькъан Миланас.

Гуллама шоллагӀа ди дӀадоладелар «Медиатоабаш вӀашагӀйохкара практикагара», из яр Афиногенов Дмитре дӀахьош, цо боксёрашта мах бола говзал елар, тоабан болх цхьана дӀабахьара даькъ тӀа.

Афиногенов Дмитрий «Таханарча заман медиафабрика» яхача проекта автор, кулгалхо ва.

Янбеков Ренат, SMM видео кхелахо ва бувзама оагӏонашка.

Янбеков Рената, NRP agency SMM кхелахочо, говзанча хьехам белар, «Урагӏа яьха видеош блогашка, иштта репортажашка» яхача темах, из чӀоагӀа теркам тӀабодаш бар. Керттера къамаьл йистедаьнначул тӀехьагӀа хьаьшашца цхьана Аьрзера гӀалаш ягӏача экскурси йир, цига шоай бӀаргашца царна яйра гӀалгӀай архитектуран хозал, мехка истори.

Гида дувц Аьрзе исторех лаьца:

«Со шозлагӀа воагӀа ГӏалгӀайче, со юха а тешаш ва, «Машук» дешара Центро дӀахьош йола кхетаче дика вӀашагӀъелла хиларах. Хӏара из дӀа мел хьоча хана, «Машука» бех керда дикагӀа бола хьаьший, царга ладувгӏа безам боагӀаш хул, хӀана аьлча уж дика кхеташ ба шоай балхах, цар хьагойт дика хьаькъалаш. Тахан, сихъенна медиа дегӏайоагӏача хана из чӀоагӀа лоархӀаме да, мах болаш а да», - аьлар Чундышко Зарас.

Железняк Юлия я «Хьаьший тӀаэцара пхьоаллен» АНО кулгалхо.

Кхетаче чакхйоалаш, «Хьаьший тӀаэцара пхьоаллен» АНО кулгалхочо, ОСИГ президентаца дагайоалача Железняк Юле, «Мохк дӀахьалхакхувла мах бола хьал» яхача темах лекци йийшар.

«Кхетаче со чӀоагӀа цецъяьлар, ший тайпара йӀайха уйлаш йисарах дег чу. Сона из дӀахьош йола моттиг хоза хиларал совгӀа, доакъашхой а дика хийтар - уж ба дийша, хьаькъал дола нах, дег чура, кӀоарггача хьаькъалца дегӀабаьхка нах, царна юкъе са балха новкъостий-журналисташ, иштта зарбан болх лелабераш ба. Царцара къамаьл ший белггала терко тӀаозаш дар. Къаьстта белгалдаккха ловра сона, хьабийха хьаьший кӀоаргга хьаькъал долаш хилар. Канавцев Михаила лекцеш геттара эшаш яр, дукха хӀама довзийташ, чулоацам бар цар. Дукхача доакъашхошца цхьана тхоайла дагадалар хилар тха. Укх тайпарча кхетаче со хьалхара я, аз баркал оал сай балха новкъоста, цун къамаьлах. Лоаман хозача моттигашка ер моттиг дӀахьош йолга хайначул тӀехьагӀа, са безам хилар Селий мехка лоаман моттигашца ер нийсъе. Баркал ала безам ба ер вӏашагӏйолларах», - аьлар шийна хетар декъаш Нисредова Хатимас.

Абаьданаькъан Ислам ва ГӏалгӀай Республикан Кулгалхочун, Паччахьалкхен Администраце болхло.

#ПроБлог кхетаче вӀашагӀъеллача, ГӏалгӀай республикан Администраце болхлочо Абаьданаькъан Ислама аьлар, ер кхетаче дӀаяхьа таро хилар ГӏалгӀай Республикан кулгалхочунца Келаматанаькъан Махьмуд-Ӏаьлаца, иштта «Машук» дешара Центра керттерча директорца Сериков Антонаца, Россе Президента СКФО гӀолла викал ваьча Чайка Юреца цхьана ер болх дӀабахьара баьча бартах.

Цо белгалдир; гуллам мохк дегӀабоалабара лоархӀаме гӀа ба, аьнна. ГӏалгӀайчено лерхӀ блогерий ишкола хьаелла, цо таро лургья республикан таронаш кхы а шерагӀа йоаржае.

Абаьданаькъан Ислама яхачох, кхетаче дика дӀайихьар, цо таро елар къамашта юкъера гӀулакхаш чӀоагӀде, иштта СКФО гӀолла медиаюкъарло хьакхолла. Цо тӀатехар, Республикан Кулгалхочо къаьстта йола терко лоаттаю туризм дегӀайоалаяра, цудухьа гӀалгӀай культуран мах бараш дӀагойтара, ГӏалгӀайчен туристически таронаш йовзийтара деш дар ер, аьнна.

Кхетачен чаккхе еш, тхо тешшаме ала йиш йолаш да: из дика дӀайихьар! Беррига доакъашхой, хьаьший раьза болаш хилар вай лоамий хозаленна», - аьлар Абаьданаькъан Ислама, республикан Кулгалхочунна хьаллацарах баркал оалаш.