ДIа а довзийта, тешам боллаш дIа а кхетабе
Магасе дийцар, гурахьа эскаре амал де тӀахьехара болх дӀа мишта хьу
ГӀалгӀайчен Кулгалхочо Келаматанаькъан Махьмуд-Ӏаьлас кхетаче дӀайихьар, цига дувца оттадаь дош дар гурахьа эскаре амал де вай кагирхой тӀахьехаш бола болх мишта дӀахьу. Хьалхара эскаре болхараш укх кӀирандийнахьа дӀагӀоргба, шоа-шоай аргӀанга хьежжа, из йистеяргья лайчилла бетта. Кулгалхочо белгалдир, цу нахаца а цар даьшца а латташ дола хьал дӀадовзийташ, дӀакхетабеш бола болх дӀабахьа безаш хилар.
«Вай цхьана дӀабовзийта беза царна цу гIулакхах бола бехктокхам, малагӀа декхар шоашта тӀадулл царна ховргдолаш, эскаре ца водаш юхагӀертача сага малагӀа халонаш нийслургья Ӏаьдала оагӀорахьара, иштта вахача моттигера аравала йиш йоацилга. Вай массане цхьана боаржабе беза цу тайпара болх, хӀаравар бехктокхаме хила веза цунца.
ХӀанз латташ йолча хана, дийнахьа а бийсан а из хаттар кхоачашде хьажа деза вай. Кхетам балара болх дӀахьош хила. Нагахьа санна паччахьалкхене, администраце, кхыча боахамашка эскаре тӀахьехаш йола ха яьннараш бале, уж дӀабахийта беза амал де. Балха болча моттигашка повесткаш дӀале. Иштта де деза юртарча администрацей кулгалхоша а», - аьлар Келаматанаькъан Махьмуд-Ӏаьлас, ше гулбеннарашка къамаьл деш.
Мехка Кулгалхочо тӀадиллар, республикан унахцӀенон министра Антошканаькъан Заремайна, эскаре баха ха яьннача наха луш йолча справкашта тӀахьожам лоаттабеш хилар, иштта из теркалдар хьалхадаьккхар тӀема комиссариата а.
Эскаре тӀахьехара дош кхетаче хьалхара дувцаш дацар.
Ховш да, эскаре болхача кагийча наьха даьша чӀоагӀа саготду, уж Россе кердача моттигашка: Донецки, Лугански халкъа республикашка е Запорожски, Херсонски областашка нийсбалар кхераш хилар. Цхьабакъда, из болх бӀаьсти дӀахьоча хана а, царна дIахайтар из иштта доацилга.
Цу хана а, иштта нах дӀакхетабеш, царца болх дӀабихьар республикан тӀема комиссариата болхлоша, доал деча даькъ тӀарча Ӏаьдала болхлоша. ХӀанз а цу моттигашка дӀахьош ба из болх.
Карарча шера гурахьа, кагирхой эскаре тӀахьехаш шоаш дӀахьош йолча кхетаченах дувцаш, ГӀалгӀайчен тӀема комиссара Гадаборшанаькъан Зоврбика тӀахьийхар республикан кхалений, шахьарий кулгалхой, моттигашкарча тӀема комиссариаташца цхьана, эскаре кагирхой тӀахьехаш дола декхар юрташта юкъе дӀа-юха декъа, аьнна, цу тӀа латташ йола ха белгал а еш.
Иштта цо терко тӀаяхийтар, тӀахьехаш бараш цу даькъ тӀа шоай ханнахьа хьабоалабе безаш хилара.
Кхетаче иштта дийцар, паччахьалкхено тӀахьожам лоаттабергболаш, балха тоаба вӀашагӀйолла езарах, цунна юкъебоагӀаш хургба тӀема комиссариата викалаш, ГӀалгӀай Республике гӀолла йолча чурча гӀулакхий министерствон, иштта кхыдолча боахамий викалаш. Келаматанаькъан Махьмуд-Ӏаьлас из хьаллаьцар, тӀехьа ца тотташ дӀачакхдаккха а аьлар.
