Тохкама болхло, прокурора гӏонча волаш Надтеречни, Шолжа кхалений моттигашка болх баьб цо, иштта Наьсарен кхален прокурор волаш а ха яьккхай. Республике шийна тӏехьа йоккха лар йита саг ва ала йиш я цох тахан. Прокуратурера дӏаваьнначул тӏехьагӏа, адвокат волаш наьха бокъонаш лораеш къахьийгад цо. Бера хана денз, наьха бокъонаш лораяра тӏехьа къахьегаш волча даь никъ гуш, дукха хӏама довзаш хьалкхийнай Светлана. Дӏахойодача хана вахаре дика масал хилар цун ший даьх.

1990-ча шера Нохч-Гӏалгӏай паччахьалкхен университет яьккха яьлча, Шолжа- Гӏалий тӏарча хьехархой училище болх беш хилар из, цул тӏехьагӏа Захаров Пётра цӏерах йолча музее къахьийгар. Тӏом хьайначул тӏехьагӏа, цигара беха Гӏалгӏайче кхаьчар цар дезал. Вай мехкарча Россе Тохкама комитете балха оттале, унахцӏенон оагӏонцарча министерстве, унахцӏенон оагӏонца лораварах йолча республикерча ганзе болх бир цо.

1998-ча шера прокуратуре къахьега йолаелар. Наьсарерча прокурора йоккхагӏа йола гӏонча, бокъонаш лораярах болча оагӏон прокурор йолаш, иштта кхыдола тайп-тайпара балхаш леладеш хьаений Светлана.

2007-ча шергара 2010-ча шерга кхаччалца, СМИ бувзамах болча тохкама оагӏон кулгалхочун гӏонча йолаш болх лелабир цо. Цу оагӏонцара ший декхараш бехктокхаме, лакхача боараме къахьегаш кхоачашдарах, майдилг луш белгалйир Светлана. 2010-ча шера маьцхали бетта денз, Гӏалгӏай республикерча РФ Тохкама комитета бахархой тӏаийбеш, каьхаташцара гӏулакх дӏахьош болх беш я Светлана.

Хьалхарча дийнахьа денз, шийна хьалхашка латта декхараш дика довзаш, лоархӏаш къахьегаш йола из «Белгалъяларах», «Болх боаггӏача боараме дӏабахьарах» йола ӏ, ІІ, ӏӏӏ лоархӏам бола майдилгаш тийна я, иштта «Бокъонаш лораярах» яхача оагӏонца РФ Генеральни прокуратуро совгӏат деннад цунна.

«Гӏалгӏай Республикан цӏихеза юрист» яха цӏи лелаеш я из тахан. Укх бӏаьстан цӏайца даькъалаювц оаха Светлана! Иразе, беркате хилда цун денош, массахана дог делаш, аьттув болаш хийла из!