ГӀалгӀайчен бахархошка кхайкарал дир Келаматанаькъан Махьмуд-Ӏаьлас, политически низаш дарах болча дагалоаттама Денца
ГӀалгӀайчен Кулгалхочо Келаматанаькъан Махьмуд-Ӏаьлас ший телеграм-каналага гӀолла республикан бахархошка кхайкарал дир, политически низаш дарах болча дагалоаттама Ди хиларца дувзаденна. Цо белгалдир, ГӀалгӀайченна дика бовзаш ба из бала, къамаш мехкахдаьха хилара хьал.
«Вайна дика бӀаргадайна хӀама да из - вай къамо дика лайра Сталина гӀозаро хьакхостаяь хинна харцон чарх.
Мехкахбаьхача хана, гӀалгӀаша, кхыча дукхача къамаша санна, боккъонца дола Ӏазап лайра, дукха къаьстар цу шийлача мехка Ӏобахьийтарах нах а»,-аьлар мехка кулгалхочо.
Келаматанаькъан Махьмуд-Ӏаьлас белгалдир, цу хана берригача мехка доазон тӀа таӀазар оттадир, цун чаккхе хилар дукхача шерашка лаьтта къизал. ГӀалгӀайчен Кулгалхочо яхачох, дукхача адама вахар хоададаь исторен ди дицде йиш яц.
«Бохабаь дезал, унзара вахар, дицлургдоаца балан денош - из дар вайна цу заман кулгалхоша хьалхашка денар.
Вай декхар да из диццадар, цу тайпара хьал кхы ца оттийтара тӀехьа хилар. Дикача хӀамах тешаш ваха веза»,- аьлар Келаматанаькъан Махьмуд-Ӏаьлас.
Цо иштта белгалдир, тахан Росси, демократически паччахьалкхе ше хиларах тарра, дика дегӀайоагӀаш а, цо ший лоархӀамедараш лорадеш а хилар.
«Дег чура лов сона; ГӀалгӀай Республикан, Россе бахархой ираз долаш, машарца, паргӀата бахар!
МоллагӀа дола во а тӀехдалда вай ГӀалгӀайченна, вай мехкá Россена!» - аьлар Келаматанаькъан Махьмуд-Ӏаьлас.
