Наькъаш дехкарах йолча ерригача Россе кхетаче дакъа лоацаш хилар вай мохк
Машиний наькъий гӏулакхех йолча министерствон хьалхалатта Хаматхананаькъан Батыр, цун гӏонча йола Хабренаькъан Макка Москве дӏайихьача «Россера наькъаш тоадар. Кердадараш, технологеш, боарам» яхача йоккхача кхетаче дакъа лоацаш хилар. Мехкарча цу оагӏонцарча гӏулакхех дувца гулбеннабар цига.
«Росавтодора кулгал деча Новиков Романа кхетаче дийцар, 2036-ча шерга кхаччалца наькъий хьал меттадоаладеш дӏабахьа лерхӏача балхах. 2030-ча шера 2160 моттигерча бахархой вахара оагӏонцара гӏулакхаш 30%-га кхоаш тоалургда, хӏаьта 2036-ча шера 60%-га кхоачаш айлургда из хьал. Наькъашкара хатараш лаьгӏдара тӏехьа дӏахьоча балхах дийцар кхетаче: 5,2%-га кхоачаш лохденнад хатараш хилар, 5,3%-га кхоачаш лохденнад наькъашкарча хатарашка сага вахар хадар, лозабаьраш – 5,6%», - дийцар «Сердалога» мехкарча Паччахьалкхено.
Ӏилман-технологически оагӏонца, таьрахьашца дувзаденнарашка гӏолла уж гӏулакхаш меттадоаладарах болча балха юкъе дакъа лаьцар вай мехкарча викалаша. 2027-ча шера ФГИС СКДФ кердача оагӏонга гӏолла дикка боаржабеш дӏабахьа лерхӏ цу оагӏонцара болх. Федеральни моттигашкара гулбеннача цу оагӏонцарча говзанчашца къамаьл хилар Хаматхананаькъан Батыра, Хабренаькъан Маккий. Цар дийцар вай мехка цу оагӏонцарча проекташка гӏолла кхоачашде дезарех. Боккха пайда боаржабеш, диканна йолаш кхетаче хилар цох массанена.
