МоастагӀа Кавказера араваккхара денца дувзаденна, моттигерча бахархошка Мехкадас даь къамаьл
МоастагӀа Кавказера вохаваь ди хьатӀаоттарца, бахархошка йистхилар вай мехкада Келаматанаькъан Махьмуд-Ӏаьла. «ТӀема сийлен ди дездеш я тахан Росси! 81 шу даьлар Кавказера моастагӀа вай бӀухоша вохаваь. Мехкдаьттанна тӀакхача гӀерташ, бирсвенна чугӀийртача фашиста вӀашагӀ мел деллар дохадир Кавказе лаьттача эскаро.
Сийлахь-боккхача Даьймехка тӀема юкъе чӀоагӀа лоархӀам болаш хилар из», - белгалдир вай Мехкадас. Республикан кулгалхочо теркалдир, Кавказера фашист эккхавеш лаьттача тӀемо 442 ди дӀалаьца хилар. Вай бӀухоша лакхара майрал, денал гойташ хиларах, ше бенача наькъах дехкедаьккхар цар Гитлера эскар.
«Тайп-тайпарча къамий бӀухой ба цхьана вай коталонга дигараш, шоай Даьхен, Советски Союза, гӀулакха лаьттараш. Кавказе чуваьнна фашист кхы дӀахо дӀа ца вахийтаро доккха дакъа лаьцар вай котдалара юкъе», - аьлар Мехкадас. Цу хана санна тайп-тайпарча къамий, йоккхача Россе бӀухой латт тахан Даьхе лораеш. «Уж нах вайна цӀаккха бицлургбац! Цар сийле йовргьяц! Массахана вай дегашка яхаргья Даьхе лораеш лаьттача турпалий цӀераш!» - аьлар Мехкадас.
