«Сай балха новкъостий, юристаш, даькъалабувц аз цар профессиональни цӀайца. Аз 40 шера совгӀа болх баьб юриспруденце. Цу профессе дӀадехар да лакха бехктокхам хилар, нийсхонна тӀехьа хилар», - аьлар вахара бувзамашка мехка кулгалхочо.

Цо иштта белгалдир, бокъоний оагӀув лорабеш, наха юкъерча нийсхонна тӀакхувш хила беза цу даькъ тӀа къахьегараш, из доацаш цхьаккха вахар а хургдац нийса. Къаьстта юридически оагӀорахьара новкъостал хиларах, кхоачашъеш я республикан лоархӀаме проекташ.

«Баркал ала лов сона дукхача шерашка закон а цхьоагӀо а лораеш лаьттарашта, тахан кагирхошта шоай балха говзал дӀалуш къахьегарашта.

Могаш, профессиональни толамаш доахаш, дӀахо Россе хьашташ кхоачашдеш, дӀабаха низ лулба царна», - аьлар ГӏалгӀайчен кулгалхочо.

Россе юриста Ди дезду оагӀой бетта кхоалагӀча дийнахьа, из ди лаьрххӀа чӀоагӀдаьд 2008 шера Россе Президента амарца. Къаьстта цу дийнахьа из хилар цаховш нийсденнадац: из доагӀаш да 1864 шера Александр ӀӀ оалача паччахьа суда реформа ярца, цигара вӀашгӀъеллай российски суда бокъон оагӀув.