ГӏалгӀайчен МЧСа чӀоагӀду цӀерца къовсам лоаттабара гӀулакх, мехка йӀовхал эттача юкъа
Республикан доазон тӀа этта хьал аттачарех цахиларах (дийнахьа ялхазза цӀи йоалаш) ГӏалгӀайчен МЧСа цӀерца къовсам лоаттабара болх чӀоагӀбеш латт. Хьалхарча аргӀагӀа из доагӀаш да хьун йистерча доазонаш тӀа ядача юрташта, яхаш, хоам бу «Сердало» газетага ГӏалгӀайче гӀолла йолча Россе МЧС ГУ.
Цӏи ялара духьала дӀахьоча балха даькъ тӀа эггара лоархӀамегӀдар да, минералаш теха оахамаш дар хьун йистошка.
Уж балхаш деш хиннаб укх деношка, дукхагӀча даькъе, Наьсарен кхален Сурхо тӀа. Администраце болхлоша, юртарча хьун боахама, Наьсарен-Шахьара, Наьсарен кхален даькъ тӀа тӀахьожама болх дӀабахьара йолча отдела кулгалхо Къоастой Муслим керте а волаш, хьакхеллар хьун йистошка минералаш теха оахамаш.
«Дӏадехаш ма хиллара, берригача хьун йистерча лаьттай арендатораша дӀабахьа безаш ба из болх. Цул совгӀа, дӀаяха езаш я еррига гаьнаш, кӀотаргаш. Цу тайпара хьахул минерализованни оала лаьттан оахам, цо таро луц цӀи дӀаяржийта.
Белгалду, цӀераш тайп-тайпарча бахьанех ювлаш хилар. Таханарча дено дӀадеххача тайпара царна духьала кийчо яь ца хуле, цӀераш сиха дӀа-юха йолхаш хиларах хьадоала зе доккха да. Минералашца лаьтта кийчдаь хилча, цӀи йоаераш хьакхаччалца из дӀа-юха яржаргьяц, цо лораю хьу а цу юхе яда юрташ а», - аьлар Къоастой Муслима.
