Цу моттиге цунга хьежаш бар, шахьара ЖКХ болхлой, уж ма хулла Ӏолийга гӀаьнаш дӀадоахаш болх беш бар. Цул совгӀа, гаьний ткъовронаш дӀатедаш, наькъа такилгаш цӀендеш кхыйола болхлой тоаба яр. Оздой Руслан раьза воацаш хилар цхьайолча коммерчески гӀишлошта, цар шоашта гонахьара доазув цӀена ца леладарах.

«Шахьара центре ший тайпара лостам хила беза. Деррига наькъаш, юкъарлон доазонаш лостам баь хила деза. Санитарни цӀенал ярал совгӀа, наькъаца гӀолла хьаллатта рекламаш дӀаяха еза. Шахьар мукъаяккха еза бӀаргаш лазадоахача хӀамаех», - аьлар Оздой Руслана.

Мэра терко тӀаяхийтар №5 йолча ишкола юхерча гӀашлой наькъа лакхе гӀолла тӀехбувлача моттига, цига баха нах а каст-каста латкъаш хул цу моттиге хьалаш во хилара. Цо аьлар, дагадоацача зуламах нах лорабара йола кийчо хила езилга, иштта керда шу дӀадоладелча, цу даькъ тӀа цӀенхаштта тоадара балхаш де дезилга.