Гӏалгӏайчен гӏишлошъяра министр хьежар, Эса чулацара болх мишта дӏахьош ба
Гӏалгӏай мехка дика дӏахьош ба Эса чулацара йола гӏишло хьалъеш бола болх, цо хӏара дийнахьа 100 эзар кубометр хий лоаттадергда. Из йоккха гӏишло хьалъеш я Шолжа кхале, «Вахара хьалаш» яхача къаман проектах. Карарча хана гӏишлонхой бе безача балхах 2% болх баь баьннаб, цар чӏоагӏа лораю чӏоагӏъяь яьнна гӏишло хьаяра балха график. Керда, лакха дикал йола моттиг дӏайолаяра бахьан да, республике хица дувзаденна чоалхане хаттар кхы дувцаргдоацаш кхоачашдар. Хий чулоацаш бола гӏирс хьалбаро таро лургья, дикал йолаш, цӏена хий лоаттаде 300 эзар сага. Илдарха-Гӏалан, Магӏалбика, Шолжа кхален бахархошта из хургда; шортта дӏакхоачаш, даим хьадоагӏаш.
«Ардара бетта хьалхарча пхийтта дийнахьа гӏишлон тӏа дика хьалаш хилар хоалуш дар. Гӏишлонхой тоаба технологеца дувзаденна балхаш деш я. Хин никъ билла лаьрхӏа сангар йоаккхаш латт, хий чакхдахара моттига бетона кӏийле еш, блокаш вӏашагӏйохкаш латт. Дӏаболабаьб 1000 кубически метр хий чулацоа гӏирс. Дӏахьу, сангараш йоахаш, чона турбаш чуйоахкаш, болх. Цу моттиге даим болх беш ва 43 саг, уж ба инженераш, технически болхлой, иштта цига я 10 лаьрххӏа йола техника. Хьабаь баьнна тӏаийца КС-3 кепа болх, ер шу дӏадоладелча денз, 245,87 млн сома ба», - аьлар «Сердало» газетага Гӏалгӏайчен гӏишлошъяра Министерстве.
Республикан гӏишлошъяра министра Иленаькъан Мусас терко тӏаяхийтар; из йоккха, чоалхане гӏишло ханнахьа йистеяккхара болхошта хьалхашка декхар оттадеш, цу гӏулакха даим тӏахьожам бу.
Цо иштта белгалдир, из лаьрххӏа йола хий чакхдахара хьоарсам, чона турбаш чуйоахкаш, цахаддаш болх беш хургдолаш хьакхоллаш хилар. Цо таро лургья бахархошта дика а цӏена а хий лоаттаде.
Керда гӏишло йистеяларга хьежжа, доакъоех латташ хургья, болх кӏезиг-кӏезиг дӏабахарга хьежжа пайда бе йолалургья, хӏана аьлча, технически тӏахьожам баь баларца, ше-ший аргӏагӏа дӏаболабе безаш ба цу даькъ тӏара болх.
