«КӀалхарваккха Грут» яха проект хьаллоацаргья Ӏалама гӀулакхех йолча министерствос
2020-ча шера денз, «КӀалхарваккха Грут» яха берий экологически проект хьаллоацаш хьайоагӀа Ӏалама гӀулакхех йола Министерство. Бераша 150 кийла хиллал дола каьхат гулдаьд. Проекте дакъа лоацаш хиннав 80 эзар совгӀа дешархо.
ДӀахойодача хана а, проект хьаллоацаш, болх бе лаьрхӀа ба министерствон болхлой. Цох лаьца дийцар цунна кулгал деча Хьулахой Саварбика; кагирхой политикахи, туризмахи йолча министерствон хьалхалаттача Малсаганаькъан Адамца.
Из хоам «Сердалога» бир Ӏалама гӀулакхех йолча Министерствон зарбан болх лелабераша. «КӀалхарваккха Грут» яхача проекта керттера декхар - зе деш йолча хӀамаех Ӏалам лорадар; цун хьал лорадара, нувхаш къоастам беш дӀакхувсара нах тӀахьехар. Дешархоша мел гулдаь каьхат юха цӀаькха чакхдаккха дӀахьош да.
«22255 кийла тиша каьхат гулдеш, 20 эзар совгӀа дешархочо дакъа лаьцача балха юкъе 2023-ча шера котбаьннараш белгалбе лерхӀ, дукха ца говш. Цул тӀехьагӀа, дӀахо дӀахьоргба из болх министерствос гӀо деш», - дийцар тхога.
