УнахцӀенон министерствос 2025-2030 шерашка лорий болх тоабергбола программа кийчъяьй
Республикан унахцӀенон Министерствос, РФ Президента тӀадиллача декхарах; вӀашагӀъеллар унахцӀенон болх тоабара йола программа. Из пхе шера кхоачашъергья; «Дӏаьха, хьинар дола вахар» яхача къаман кердача проекта чуйоагӀаш.
ГӏалгӀайчен Кулгалхочун зарбан болх лелабераша хоам баь хиларах тарра; цхьан шера Ӏаьлий-Юрта дарбанче хьалъяь йоаккхаргья, иштта Чамалха фельдшерско-акушерски пункт а е лерхӀаш я. Цул совгӀа, таханарча заман лорий гӀирс, хьалхарча аргӀагӀа эшаш йола автотранспорт эцаргья.
2025-2030 шерашта лаьрхӀача программанна чуйоагӀаш лораша къахьега моттигаш тоае лаьрхӀад: керда ялх дарбанче хьалъергья, иштта хьалъе лерхӀаш я 12 юртара амбулатори. Йолаш йола пхи дарбанче цӀенхаштта тоаергья, иштта хьалхарча мугӀарашка 500 гӀирс, автомобилаш, дӀа-юха лела комплексаш эцаргья.
«Россе Президента из декхар тӀадиллад мехка лорий хьалаш дикал йолаш хилийтара, массанега дӀакхоачаш уж хургдолаш», - аьлар ГӏалгӀайчен кулгалхочо Келаматанаькъан Махьмуд-Ӏаьлас.
Цо иштта белгалдир, укх тӀехьарча пхе шера лорий хьалаш республике дикка хувцаденна хилар дикача оагӀорахьа. Иштта дале а, дика болх вӀашагӀболлара эшаш ба унахцӀенон балха дика говзанчаш.
