Тиймарзанаькъан Муса Магаса кулгалхочун дарже чӏоагӏвир
Хьалхагӏа Магаса мэра декхараш кхоачашдеш хинна Тиймарзанаькъан Муса, хӏанз цун кулгалхочун дарже чӏоагӏвир, яхаш, дийцар «Сердало» газетага ГӏР Паччахьалкхен зарбан болх лелабераша.
«Из иштта лаьрхӏар доал деча даькъ тӏарча «Магас-Шахьара куран» депутатий Кхело. Депутаташа, цхьа барт болаш, хьаллаьцар Тиймарзанаькъан Мусай оагӏув.
Гӏалгӏай Республикан Кулгалхочун, Паччахьалкхен Администраце кулгалхочо Мархенаькъан Анзора белгалдир, балха хьалхарча дийнахьа денз, ше мэра декхараш кхоачашдеш волаш, Тиймарзанаькъан Мусас ше лерттӏа кулгалхо хилар хьагойтар, мехка столица дегӏайоалаяра ший мел йола ха дӏайохийташ», - аьлар хоамо.
Шахьара Кхела депутаташа цун балха боаггӏача беса мах оттабир, из даькъалавийцар дӏахо а иштта къахьегара тӏехьа.
Тиймарзанаькъан Мусас дег чура баркал аьлар республикан кулгалхошта, депутаташта; шийна из тешам баларах, ше дӏахо а Магас-Шахьар дегӏайоалаяра къахьега раьза хилар белгал а деш.
