ГӀалгӀайчен ИЗО музейс гойтам кийчбаьб, гӀалгӀай паччахьалкхен цӀай дездеш
ГӀалгӀайчен исбахьален Паччахьалкхен музее лаьрххӀа хьабийллар; «Суртанчаш, говзанчаш - гӀалгӀай паччахьалкхен 100 шу дузаш» яха гойтам. Цу гойтамо вӀашагӀтехар итташ суртанчаш, говзанчий балхаш, цар хьагойт искусствон тайп-тайпара оагӀонаш: сурташ, графика, скульптура, кулгаговзал.
«Хьокха оттабаьча балха юкъедоагӀаш да 65 начӀал долча суртачий, кулгаговзала, кхыдола балхаш. ХӀара балха даькъ тӀа го йиш я халкъа начӀал, культура, Ӏадаташ, цо белгалйоаккх искусствон исторе лоархӀаме моттиг. Тахан вай таро я хозален дунен чу дала, начӀала, тӀехьален дуне бӀаргаго, цо вайна хьалхашка хьаелл тамашийна оагӀонаш. Укхаза хьавеначоа го йиш я, ший тайпара дог гӀоздоаккхаш йола паргӀато, дега салоӀам, дунен хозал», - аьлар, ше моаршал хоатташ дола къамаьл дӀадоладеш, ГӀалгӀайчен культуран министра Лаьнанаькъан Залинас.
Гойтам хьабеллача баьхка хилар культуран, искусствон викалаш, мехка Ӏаьдала болхлой, юкъара болх лелабераш. Гойтам хьабеллаш, музея кулгалхочо ТӀумхой Любас белагалдир, ГӀалгӀайчен мах бола истори а культура а хилар, хӀаьта искусство а я, лоархӀаме дакъа дӀалоацаш, культуран тӀехьале лораяра, из дегӀайоалаяра.
ГӀалгӀайчен Кулгалхочун Администраце, Паччахьалкхен кулгалхочо Оздой Джамбулата белгалдир, гойтаме оттабаь хӀара болх ший тайпара тамашийна хилар, цо гӀалгӀай къаман истори, культура хьагойташ хилар.
«Суртанчаш, говзанчаш - гӀалгӀай паччахьалкхен 100 шу дузаш» яха гойтам дӀахьоргба тов бетта 9-ча денга кхаччалца. Цу ханага кхаччалца республикан хьаьший, бахархой таро хургья гӀалгӀай къаман таронаш йовза. Кагирхой Пушкински картага гӀолла цига баха йиш йолаш ба.
