«Дошо Гӏала» яхача кинофестивале дакъа лаца ловраша дукха дехараш чуденнад
ГӏалгӀайчен «Дошо гӏала» яхача Халкъашта юкъерча кинофестивало дукха доакъашхой юкъебаьхар. ГӏалгӀай Республикан Кулгалхочун, Паччахьалкхен зарбан болх лелабераша яхачох, хьачуденна дехараш дӀадахача шера хиннарел 50% дукхагӀа да. Карарча хана хьабайта болх ба 136.
Цу юкъе дукхагӀа ба кердабараш, хьалха российски моттигашкара, иштта СНГ мехкашкара хулаш хиннача дехарашта тӀакхийтар БРИКС мехкашкара кинематографисташ: Бразилера, Индера, Иранера, Кубера, Нигерера, иштта Аргентинера. ГӏалгӀайчен кулгалхочо Келаматанаькъан Махьмуд-Ӏаьлас яхачох, из да наха цу фестивала тешам луш хилар, профессиональни юкъарлон фестиваль йовзаш хилар а да.
Кинофестивалага кийчо яра болх дӀахьоргба, лайчилла бетта 15-ча денгара 20-ча денга кхаччалца. Дехараш хьаэцар чакхдоал ардара бетта 25-ча дийнахьа. Фестивале дакъа лоацараш хьалха хинначул дуккха а дукхагӀа хургба. Мехкадас иштта белгалдир, «Дошо гӏало», лерхӀам боккха хиларах, ше культуран даькъ тӀара дукха начӀал дола нах вӀашагӀтоха майда хиларах тарра, цо таро лургья къонача режиссёрашта шоашта карагӀдоалар гойта.
«Вайна лоархӀаме да, фестивало патриотизма, исторически дагалоаттама, халкъа цхьоагӀон темаш, ГӏалгӀайчен хӀара вахархочунна гарга дола мах бараш цига дувцаш хилар», - аьлар цо.
Белгалду, «Дошо гӏала» яха ХӀ-гӀа фестиваль хетаяь я Сийлахь-боккхача Даьймехка тӀема Коталон 80 шу дизара. Яхьа программанна чудоагӀаш да документальни фильмаш, цар дувц турпалхой вахарах, деналах, исторически лоархӀамеча моттигах.
