Эбарга-Юрта вахача Мархенаькъан ИбрахӀима аьлар, маӀача сага ший ахчах ийца трансформатор тока саьргах дӀатасса вӀаштӀехьа далац. Цул совгӀа МРСК оарцагӀа йийхача а хӀама хиланзар. Цунца дувзаденна, республикан кулгалхочо аьлар, ер шу чакхдалале из дош кхоачашдергда, энергокомпанеца дага а даьнна.

Йоккхача Ачалкхера Чопанаькъан Исроапила ший аргӀагӀа хаттар делар Келаматанаькъан Махьмуд-Ӏаьлага, шоай ток кӀезига хиларах лаьца; из бахьан долаш, тока гӀирсаш а дох, цӀи йоалаш йола моттигаш а нийслу. Из хаттар кхоачашдар шийна тӀаийцар Паччахьалкхен вице-премьера Балахой Микаила, цо аьлар трансфрматорни подстанци дукхагӀа низ болчунца хувцаргья ер шу чакхдалале

Наьсаре вахача Бузуртанаькъан Мурада а цу тайпара хаттар делар. Мехка Кулгалхочо шахьара мэра, «Ингушэнерго» болхлошта тӀадиллар, лайчилла бетта 25-гӀа ди хьатӀадале, из хаттар тахкар, цунах бола хоам шийга бар.

Иштта Балахойнаькъан Микаила тӀадиллар, малагӀча юрта токацара хьал хувца дезаш да хар, цу гӀулакха лаьрхӀа тӀахьожама болх дӀабахьар.