Гӏалгӏайчен халкъа фронто Къилбаседа Кавказе дера йоагача цӏера дакъа
Александровски беша Цӏи йоацача салтечун Каша тӏа хьалсегача, Даим йоагача цӏера дакъа укх сахьаташка хьакхоачаш да Гӏалгӏайче, дийна дагалоаттам санна. Москвас мехка моттигашца декъаш да из сийлен цӏера дакъа, цо белгалду, вай боккхача мехка дерригача халкъа юкъара Котало из хилар. Моастагӏа юхатохаш, доккха дакъа дӏалоацаш Гӏалгӏайчен цу юкъе хилар лерхӏаме да.
«Из тхона духхьал никъ хинна ӏац. Из дагалоаттама никъ ба, из оаха дӏахьу керттердар лорадара - котало яьккхарий лерхӏама, ноахалцара бувзам лорабара. Цу тайпара моттиг хилча ший мехках доаккхал ду», - аьлар «Сердало» газетага Халкъа фронта моттигерча даькъа исполкома кулгалхочо Тенканаькъан Башира.
Гӏалгӏайче цу юкъе бувзама оагӏув я. Столицера цӏи лоараяра хьал Халкъа фронта моттигерча викалаша шоашта хьатӏалаьцар. Дӏахо из дӏаелар Нохчий, Селий мехкашта, цох хургба хадаш боаца дагалоаттама Никъ.
Даим йоагаш йола цӏи республикашка гӏолла дӏахьош хиларо хьагойт Кавказа халкъа исторически юкъара вахар а, йоккха котало яьккха хилар а.
Даим йоагаш йола цӏи Гӏалгӏайче, цигара дӏахо Шолжа-Гӏалий тӏа, Махачкале дӏахьош хилар - из кхувш йоагӏача тӏехьен дика масал да. Из цӏи мел йоаг, ханашта юкъера бувзам хадаргбац, Даьхен бӏухой турпалал дицлургдац. Из белгала хьал да, цо вӏашагӏтох вай даьшта карагӏдаьнначун гонахьа Кавказа моттигаш, беррига мохк.
Хӏанзчул тӏехьагӏа супа цӏи йоагӏаргья Магаса, Шолжа-Гӏалан, Махачкалан мемориалашка, машара мах а исторе бакъдар а мел лоархӏаме да диц ца долийташ.
