Москве Новакаца республикан хӏама тоадарах дийцар вай Мехкадас
Российски Федераце Паччахьалкхен Кулгалхочун гӏонча волча Новак Александраца Москве кхетаче дӏахьош хилар вай мехкада Келаматанаькъан Махьмуд-ӏаьла. Мехкара вахара-экономически хьал дикка тоадарах, йоккхий инвестицей проекташ йоаржаярах, иштта кхыдолча лоархӏамедарех дийцар хьакимаша. «Сердалога» из хоам бера Мехкадаь зарбан болх лелаберашкара.
Керттердарех да, аьнна, къоастадир цига газ чуйилларца дувзаденнараш. Мехкара промышленни хьал тоадара тӏехьа цу оагӏонцара кхоачамбоацараш меттадоале дезилга белгалдир кхетаче, иштта цига дийцар республикерча экономически хьалах а.
Келаматанаькъан Махьмуд-ӏаьлас вице-премьера йовзийтар моттигера йоккхий, лоархӏаме проекташ. Царех я таьрахьашца дувзаденнарех йола академи, Смарт-отель, 22 гектарага кхоачаш йола теплични моттиг, шера 100 тоннага кхоачаш беркат лоаттадеш йола коа тӏара оалхазараш кхеду моттиг, «ӏарамхи» курорт, республикера Барта доазув тоадеш дӏабихьа болх.
Иштта ший къамаьла юкъе вай Мехкадас хьоахадир кӏалах хӏамаш хьаеча кластерах, «Жӏайрахь» яхача промышленни парках. Мехка хьалъеш латт хиш цӏендеш йола моттиг, цӏагӏа эшаш йола хими арахеца завод, коача газа оагӏонца машинашта доагор лоаттадергдола ӏалама газ хьайоаккха моттиг (СПГ).
«Цу моттигаша мехкара экономически хьал дикка тоадарга сатувс оаха, иштта бахархошта болх бе керда моттигаш а хургья», - аьлар вай Мехкадас. Новак Александрá, республикера гӏулакхаш хьаллоацаш хиларах, доккха баркал аьлар Келаматанаькъан Махьмуд-ӏаьлас.
