Наьсарен керда мэр духхьашха шахьара хьалага хьожаш хилар
Наьсарен кулгалхочо Оздой Руслана лаьрхIар, вIаштIара даьча цIеной коашкарча лостамга хьажа. Коммунальни гIулакха викалашца цхьана из хьежар Базорканаькъан, Московски урамаш тIарча цIеной коашкарча хьалага.
«Вай балха салоIаш дола ди яхар хургдац, е отпуск а е цIай дола денош а хургдац. Вайга кIезига ха я, вай хIанз ма хулла къахьега дезаш да шахьара даькъ тIа лостам беш»,-аьлар Оздой Руслана, цу цIеношка бахача нахаца къамаьл долча хана.
Цо белагалдир, дукхача хана денз кхоачаш ца деш лаьтта декхараш дIакхоачашдергда хьалхарча аргIагIа. Цунна эггара чIоагIагIа дагадоаллар - нувхаш дIаяхар, ковнаш цIендар, подвалашка латта бIеха хиш дIаахара дола гIирсаш хувцар.
Шахьара администраце зарбан болх лелабераша яхачох, коашка лостам бара болх кулгалдара компаней болхлошта тIахила беза, бакъда уж аукционе гIолла чIоагIъяь яллалца, доал деча даькъ тIара лостам лелабераш ба из болх бе безараш.
«Доал деча даькъ тIарча компанецара дош къоастадаь даллалца - оашош хьабе лостам. ЖКХ хьалхагIа санна беш хургьяц хIанз болх», - аьлар Оздой Руслана, ший хьалхарча гIончаца Котаганаькъан Аптеца, ЖКХ кулгалхочунца Эккажанаькъан Хьасанбикаца къамаьл деш.
Ше хьожаш волча хана, цо лоархIаме декхараш оттадир: коашка лостам бар, нувхаш дIаяхар, урамашка, аллеяшка сердал луш йола лампаш хувца, аьнна. Цо иштта тIадиллар чIоагIа нувхаш Iокхувсача моттиге видеокамера оттае, аьнна.
