ГӀалгӀайчен водителашта хьалхадаьккхар, сердал луш йола къоанзолг лоархӀаме хилар
Сердал луш йола къоанзолг тӀаювхаяр мел лоархӀаме да хьалхадаьккхар ГӀалгӀайчен водителашта. Из хоам «Сердало» газетага бир ГӀалгӀай Республикан МВД Госавтоинспекце.
«Новкъа лелара бокъонех, ара баьде йолча хана, цӀаьхха машин еха е цхьан гӀулакха саца везаш нийслойя, сердал луш йола къоанзолг тӀаювхаш хилар лоархӀаме да», - йоах наькъа полице хьехам тӀа.
Мехка ГАИ болхлоша машинашца леларашта хьалхадоаккх: сердал луш йола къоанзолг тӀаювхаш вола саг хоалуш ва 150 метр гаьнара, хӀаьта Ӏаьржа гӀирс бувхаш вар 17 метр гаьна волаш,ӀажагӀа гӀирс - 37, кӀай гӀирс 55-метр.
Ховш да, Ӏаьржа гӀирс гаьннара зе атта дац. Машинашца лелача наха шоай сакхетам совбаккха беза. ГӀалгӀайчен юрташка, шахьарашка дукхагӀча наха Ӏаьржа гӀирсаш дувхадеш хиларга диллача, царна сердал луш йола къоанзолг дика хургья.
Цу кхерамзлен боарамга даха деза бераш а, зӀамига долча хана денз, гидоахкадеча тӀормигаш тӀа, барзкъаш тӀа сердал луш йола хӀама йоаллаш хила еза.
