Цхьайолча моттигашта сийлен цӀи яларах дийцар республикерча Парламенте
ТӀом лаьттача шахьарашта, юрташта «ТӀема сийлен моттиг» яха цӀи яларах дийцар Халкъа Гулламе. Цу гӀулакхацара бокъо хьакхоллар, Коталон 80 шу дизар хьатӀадоагӀаш, республиканна лоархӀаме хургдолга белгалдир мехкадас Келаматанаькъан Махьмуд-Ӏаьлас.
«Цу гӀулакхо вай къонабарий Даьхенцара безам чӀоагӀбергба, даьша тӀема аренашка гойтача деналах дола истори дойтаргдац», - белгалдир Келаматанаькъан Махьмуд-Ӏаьлас.
Проектага диллача, из цӀи лургйола моттигаш хьахаржар юкъара болх лелаберашта, бахархошта, иштта кхыйолча Ӏаьдала моттигашта тӀалатт. Мехкадаь чӀоагӀонца кхеллача комиссе из деррига тохкаш болх дӀахьоргба.
«ТӀема сийлен моттиг» яха цӀи еннача шахьарашка, юрташка Сийлахь-боккхача Даьймехка тӀема юкъе хиннарашта лаьрхӀа дагалоаттама чурташ, гӀармаш, иштта кхыдараш увттаде йиш хургья.
