«Хатар 5051» яха документальни кино гойтар мехкарча хьехархочо
Цхьаккха бехк боацаш, харцо тӏакхелла вай къам мехкахдаьккха Казахстане ӏодахьийта 82 шу дизара хетадаь «Хатар 5051» яхача документальни кинон режиссёр хилар вай мехкарча хьехархочох Хамхой Миланах.
Из хоам «Сердалога» бир «Бералла наькъаш» яхача ерригача Россе проекта доакъашхочо Коазой Миланас.
«Наьсарерча № 3 йолча ишкола кулгалхочун гӏонча йолча Хамхой Миланас Гаьгенаькъан Г. А. цӏерах йолча Къаман унахцӏенон оагӏонцарча колледжа студенташца боккха болх дӏабихьар. 1944-ча шера къам мехках даккхар гойтар цар. Документальни, исбахьален оагӏонцара доакъош юкъе долаш да вӏашагӏделла кино», - дийцар тхога.
Цунга хьажа яха хилар «Бералла наькъаш» яхача оагӏон тоаба, моттигера координатор хьалха волаш. Цар белгалдир, «Хатар 5051» яхар нах мехкахбахара истори кердадоаккхаш, чӏоагӏдеш бола лоархӏаме болх болга.
