Бизнес йоаржае аьттув лу, вай мехкарча пенсионерашта
«Пайдане, дика экономика» яхача къаман проектага гӏолла йоаржаеш йолча «Дото старт» яхача федеральни программо бизнес йоаржае аьттув лургба вай пенсионерашта.
Мехкадаь зарбан болх лелабераша белгалдечох, цхьацца хӏама хьадеш къахьега безам болча боккхагӏа болча бахархошта, шоай цхьа хӏама хьаделла аьттув лу цу программас. Цхьацца хӏаманца шоашта ховр, ӏомадаьр доаржаде вӏаштӏехьа да цар тахан. Программанна юкъе да бизнес лелае эшаш долча дешара оагӏонца дувзаденнараш, таьрахьашцара говзал, ахчанцарча кхерамзленца дувзаденнараш. Цул совгӏа, царна эшар дӏахьехаш нах хургба, толашагӏа йолча бизнес-проекташта гранташца гӏо дергда; иштта ховр, ӏомадаьр дӏа-хьа эца, вӏаший доаржаде йиш хургйолаш тоаба вӏашагӏйолла аьттув ба.
«Пенсе бахача наха гӏо дар, цар оагӏув хьаллацар тахан лоархӏамеча декхарех да мехка. Ха яха нах эггара дукхагӏа хиларца, Россе регионашта юкъе хьалха латташ да вай», - белгалдир вай мехкадас Келаматанаькъан Махьмуд-ӏаьлас цу программах дувцаш. Программан юкъе дакъа лаца безам бараша укх бетта 26-гӏа ди тӏакхачале Наьсарерча «Са бизнес» яхача моттиге чудала деза ший дехар, е рф.дотостарт керттерча сайте. Дакъа лацар мах бала безаш дац.
