Интернете гӏолла тийшаболх лелабу зуламхо лохаш да ӏаьдал
13.01.2026 10:16
Интернете гӏолла тийшаболх лелабеш, Магӏалбикерча вахархочунгара ӏехаваь ахча лочкъадаьча зуламхочунна духьала РФ УК 2 д. 159-ча ст. гӏулакх хьадийлла, из лохаш ба Россе МВД «Магӏалбик» яхача МО тохкама оагӏон болхлой. Из хоам «Сердалога» бир МВД зарбан болх лелабераша.
«ӏаьдала болхлошка латкъа венача вахархочо белгалдечох, «Валютни биржа» яхача оагӏонга гӏолла интернет-адрес хьатӏаденад цун телефона тӏа. Цу адресах дӏатӏаваьлча, малашб ца ховча, бувзаме баьннача наха цу биржага гӏолла ахча хьаде тӏахьийхав из. Цар дувцачунга ладийгӏа, 16 эзар сом ахча дӏатӏадахьийтад цо, бакъда шийна тийшаболх хиннилга хайна ахча юхадерзаде волларах хӏама хиннадац», - йоах хоамо.
Зуламхо лохаш да ӏаьдал, боаггӏача боараме из бехктокхаме озар духьа.
