«Шоана, кхалнах!» яха концерт хилар Наьсарен РДК
Укх деношка, хьатӏадоагӏаш Халкъашта юкъера кхалнаьха ди долаш, культуран Цӏагӏа «Шоана, кхалнах!» яха концерт дӏадихьар. Зал хьалйизаяр бӏаьстан сийрдача денах.
«Сцена тӏара хьахозаш дар къонабарий а, иштта дика бовзаш болча а артистий иллеш. Царна юкъе вар Гарданаькъан Шамал, Оздой Адам, Пхьугӏой Амир, Балай Мухьмад, Беканаькъан Рахьман, Барханой Заьлмаха.
Къаьстта безам тӏабодаш дар Гӏалгӏайчен халкъа артиста Хулаганаькъан Артура кулгал деча иллиалархой кружока дӏахьош хинна программа дакъа. Къонача артисташа ӏамарханаькъан Мухьаммада, ӏамарханаькъан Самирас, Султиганаькъан Хадижас хьажархошта дег чура безаме иллеш делар совгӏата. Цига иштта дакъа лоацаш яр «Магас» яха иллей, халхара Паччахьалкхен фольклорни ансамбль. Артисташа гойтар вай ӏадатий, культуран хоза оагӏонаш», - аьлар «Сердало» газетага концерт вӏашагӏделлараша.
Кхетаче дӏахьош вар Хулаганаькъан Артур. Цо даькъалабийцар ноаной, беррига кхалнах, царна лаьрхӏа илли а аьлар. Иштта цу кхетачене дакъа лоацаш яр Наьсарен кхален администраце вахара отдела кулгалхо Саганаькъан Мадина, Наьсарен кхален хоржамий комиссе кулгалхо Ховтанаькъан Аьсет, Гӏалгӏайчен РДНТ исбахьален кулгалхо Абдурзаканаькъан Аьсет.
Цӏай хоза чакхдаьлар, цига хьабаьхкача кхалнаха массанена зизаш делар. Цунца гуш дар вай кхалнаьха терко а йоакхо еш хилар.
