ВIашагIкхетаре вай Мехкдас белгалдир, республика хьалхашка оттадаь хинна дукхагIдола кхоачашде дезараш хила доаггIача боараме дIадахьа аьттув баьннаб, аьнна. Эггара хьалхарча юхьанца тоаде оттадаьдар, Россе президента теркалдаь, кхоачамбоацараш. Царех дар, региона социально-экономически хьал тоадарах дараш.

Теркаме лаьцадар, наха социальни хьал хьаллацара луш дола ахча, дIаденна ца доалаш говш хилар. «Таханарча дийнахьа ахча дIацалуш йиса моттигаш яц республике», — аьлар Келматанаькъан Махьмуд-Iаьлас. Иштта, белгалдир республике дуккха лоархIаме объекташ хьалъяь хилар, Мехка Къахьегамах йолча министерства гIо а деш.

Хьоахадир, кхы дIахо йодача хана, лоархIамеча мугIарех йола объекташ дIайолае лаьрхIа хилар.
Къамаьла юкъе вай Мехкдас белгалдир, ковид яхача лазарацара хьал а аттачахьа даккха аьттув баьнналга. Эггара халагIа йола ха, цу лазараца, вайцига эттача хана Россе Президента молхашца, лакха говзал йолча лорашца доккха гIо дир республика. Россе унахцIенон йолча министерства новкъосталца дикка аьттув хилар, вайцигара лораш цу лазара духьала дарбе де кийчбе, Iомабе.

Путин Владимира теркал дир, республикера экономически хьал тоалуш латталга, керда гIишлош хьалъярца дувзаденнараш а дикагIча хьале дийрзалга.

Вай Мехкдас республике из болх ма хетта дIабахьара тIехьа, лаьтташ кIезига да аларга хьежжа, дуккхача гӀатех (этажи) латта цIенош хьалдара тIехьа, дIабахьа беза из болх, аьлар Россе президента.

Иштта, республике тоадедезарех да хицара гIулакх а. Путин Владимира теркаме оттадир, республике ишколаши берий бешамаши тоаш ца хилар. Из хьал тоадара тIеха, тахан, ма даггара къахьегаш да тхо аьлар Келматанаькъан Махьмуд-Iаьлас. Укх шера регионо массе оагIорахьара тоаяь яьнна дIачулургья 20 ишколи 9 берий беши. 2030 шу кхачалехьа, цу мугIарера кхоачамбоацараш, цхьан кога тIа даьнна хила деза.

Вай Мехкдас хьоахадир, республике ма даггара болх дIахьош къамани, региональнии проекташ йолга.