«Россеташ Къилбаседа Кавказ» шоай болх дIахьош я

8-ча классе дагIача берашта токацарча кхерамзленах дийцар «Ингушэнерго» филиала болхлочо Котанаькъан Азас, Наьсарерча тока тIахьожам лоаттабеча къахьегамхоша Дударанаькъан Хьасана, Хутенаькъан Адама. ЛоархIаме къамаьл хьаллаьцар 11-ча класса дешархочо Малсаганаькъан Мустафас. Из ва дуккхача яхьашка, олимпиадашка хьалхара моттигаш йоахаш, дика дешаш хьавоагIа дешархо.

Цул совгIа, спортсмен волаш, Кисловодске, Ессентуке хиннача боксах долча къовсамашка дото мейдилг яьккхай цо. Ток йолча моттигашта юхе цIераш летае, чкъаьрий лувца, ловзаш лела йиш йоацилгах дийцар берашка. Лотабенна тока аьшкасаьрг, хий детташ дIабоабе йиш йоацилга, иштта Iобежача аьшкасаьрга эггара кIезигагIа яле а бархI метр гаьна хила везилга, иштта кхыдола токаца дувзаденна лоархIамедараш дайзар дешархошта.

Токах лоравалара бокъонаш йовзийташ йола «Ток-Урок» дIайихьар Малсаганаькъан Мустафас. Цу ток-яхье хьалхара моттиг яьккхача Даскенаькъан Аминайна дипломи совгIаташи делар. Проекта тIеххьарча даькъах дар ток техача сага гIо дар. Цу гIулакхах болча говзанчаша берашка дийцачох, ток теха саг кIалхарваккха йиш я, ха ца йоаеш, сиха а нийса а гIо дой. Сага хисапе хьаяьча хIаман гIонца дIахьекхар цар, эггара хьалхарча аргIагIа саг кIалхарвоаккхаш де дезараш. Из гIулакх шоай вIаштIехьа мишта доал хьажа аьттув хилар берий.

«Россеташ Къилбаседа Кавказ» яхача болх беча нахаца тха ишколо бувзам лелабу дукха ха я. Шоай болх лакхача боараме дIахьош, къахьегамхой ба уж. Дика дешача бераша цу тайпарча урокашка дакъа лацар а, пайдане да. Ерригача ишколо лоархIаш долча берашта нийса хила, цар яхар хьаэца ловш хул кхыбараш. Токах лораваларах дувцаш йола урокаш геттара чIоагIа эшаш я тахан«, — дийцар Наьсарерча № 2 йолча ишкола кулгалхочун гIонча йолча Буражанаькъан Лейлас.

«ЧIоагIа хоза хеташ дакъа лаьцар аз цу проекта юкъе. КIоаргга уйла яйташ дола дукха хIамаш дайзар сона цунга гIолла. Вай вIалла теркалдеш доацараш, мел кхераме хила йиш я хайра сона. ДIахойодача хана а цу наькъ тIа къахьега безам ба са», — аьлар Малсаганаькъан Мустафас. Урок йистейоалаш, берашта дIайийкъар токацара бокъонаш тIалатта линейкаш, закладкаш, иштта кхыдараш а. «Ток-Урок» яха проект дIахьош я ерригача Къилбаседа Кавказе.