Республикан инвестицей, экономикан таронаш гойтарья цу экспозице, из дегӀаяра даькъ тӀа керттердар гойтаргда, иштта из хургья инвестораш, цу даькъ тӀа къахьега лаьрхӀа бола нах вӀашагӀкхетара, керда балха бувзам лелабара йола кӀийле.

«Паччахьалкхено цу гӀулакха  керттера теркам тӀабохийт,  хӀана аьлча мехка  инвестицеш юкъеяхарца,  наха балха моттигаш а тӀакхеташ хиларах. Къилбаседа Кавказа федеральни куран чуйоагӀа моттигаш дегӀайоалаяра, 2023 шера федеральни бюджетера 731 млрд сом совгӀа хьадайтад. Духхьал хьалхарча аргӀагӀа юкъейоалае езаш йола инвестицей проекташ кхоачашъеш хиларо юкъедаьккхар 2021-2023 шерашка куран экономика чудоагӀаш 362 млрд сом. 2030 шерга кхоачаш, юкъеяьха инвестицеш 2 трлн сомага кхоачаш хургья. Из кхоачашдара дӀахьош ба вӀашагӀбелла болх, цунна чуйоагӀаш я Кавказера инвестицей кхетаче. ДӀадахача шера кхетаче баьхка хилар 15 мехкара викалаш, цу майдан тӀа кулг яздир 150 млрд совгӀа сома 50 каьхата. Карарча шера вай кхы а дукхагӀа из хьокхам хургба, аьнна, хет»,- аьлар Российски Федераце Паччахьалкхен Председатела заместитель волча Новак Александра.

ДукхагӀа йола СКФО экономика дегӀайоалаяра  таронаш я юртбоахама, туризм, санаторно-курортни балха доакъош тӀа. Цул совгӀа, дика дегӀайоагӀаш я промышленность. Къаьстта цу даькъ тӀара хьал гойташ хургба мехка гойтам. Цунца цхьана гойтаме хьабаьхкарий таро хургья, Къарший-Черсий, ГӀаьбартой-Балкхарой, Нохчий Республикай, Ставропольски края, Къилбаседа ХӀирий-Алания, АьдагӀе, Cелий мехка, ГӀалгӀайчен, иштта Абзой, Къулбехьен ХӀирийчен Ӏалама хозаленаш го.

Мехкаша теркам тӀабохийт шоай дикагӀча инвестицей проекташта. Масала, Ставрополе керттера терко тӀайохийтаргья Кавказа Минеральни  Водашта, из цаӀ мара йоаца  дукха шахьараш-курорташ чуйоагӀа классически таро я.

АьдагӀой Республико гойтаргья мохк дегӀабоалабара йола ши проект: «Тахтамукайски кхален» промышленни доазув, «Лагонаки» яха Ерригсезонни лоаман экокурорт хьакхоллар. ГӀабартой-Балкхарой гойтаме гуш хургда, Тырныауз оалача моттигера хьайоккхача бийдалах хьадеш дола гӀирсаш, иштта Нальчик-Шахьаре лакхача технологен парк хьалъяр, кхы дӀахо де лерхӀаш дараш.

ГӀалгӀай Республико дувцаргда «ГӀибухен-Къулбехьен» МТК Транскаспийски наькъ тӀа де лерхӀачох, Кавказа лоамашка гӀолла керда хьабелла лерхӀача наькъ тӀа карагӀдаргдолчох. Нохчий Республикан стендага хьажа баьхкарашта го йиш я тематически доазонаш гуш бола боккха  гойтам-презентаци.

Кхетаче дӀахьош, мехка стендашка кхетаченаш дӀаяхьа а, бартчӀоагӀам беш долча каьхаташта кулг язде а, йоккха культурни программа дӀаяхьа а, мехко арахецаш дола юртбоахама маша чама миштад хьажа а лерхӀ.

Кавказа инвестицей кхетаче дӀахьош я Къилбаседа Кавказа федеральни куран  социально-экономически хьал дегӀадоаладара.

Кхетаче-2024 дӀахьош хилара керттеръяр «Йоккха Кавказ - фордагара фордага кхоачаш» яха тема я. Къилбаседа Кавказ дегӀаяра керттерча хаттарашта хетадаьд из вӀашагӀкхетар, дӀахо инвестицеш юкъеяхара, мехка вахара хьал, экономика дегӀайоалаяра.

Кавказа инвестицей кхетаче вӀашагӀъеллар я Росконгресса Ганз, их хьаллоацаш я Российски Федерацен экономически дегӀаахара Министерство.

 Кхетачен кердача хоамага хьажа йиш хургья Кавказа инвестиционни  сайта тӀа: