Гӏалгӏайчен хин оагӏув дегӏайоалаярах дийцар Москве
Россе гӏишлошъяра Министерствон кулгалхочун гӏонча Гордеев Юрий, Гӏалгӏайчен гӏишлошъяра министр Иленаькъан Муса балха тӏехьа вӏашагӏкхийтар, из хетадаь дар моттигера хьалаш дегӏадоаладара, иштта гӏишлош хьалъяра ахчанца новкъостал дара. Теркама юкъе дар Эса хи тӏа хий чулоаца гӏирс хьалбар, иштта Шолже хиш цӏендеш дола гӏирсаш хьадар.
«Уж шаккхе а моттиг геттара эшарех я, уж Гӏалгӏайчен кулгалхочо Келаматанаькъан Махьмуд-Ӏаьлас ше теркам лоаттабеш а я. Республикан гӏишлошъяра Министерствон кулгалхочо дийцар, хиш цӏендара гӏирсаш хьалдарах, Шолжа хий цӏендара уж накъадоалаш хиларах. Эса хи тӏа хий чулоацаш бола гӏирс хьалбар эггара йоккхагӏа йола республикан гӏишло я, из лаьрхӏа я дукхача хана денз бахархошта хьалхашка нийслуш дола кхоачамбоацараш дӏадахара, наха цӏена молаш дола хий лоаттадара.
Боахама кулгалхочо баркал аьлар Паччахьалкхенна, Россе гӏишлошъяра Министерствонна из гӏулакх кхоачашдеш новкъостал дарах. Из болх чакхбаьлча, Гӏалгӏайчен дукхача юрташка бахача наха цахаддаш хий лоаттаде таро хургья», - аьлар «Сердало» газетага моттигерча гӏишлошъяра Министерстве.
Тхоца къамаьл даьчо яхачох, цу проекта чудоагӏаш да 90 км хин турбаш Эсанна кӏалгӏолла чуяхкар. Хӏанз гӏишлонхой массехк даькъ тӏа къахьегаш ба, эггара чӏоагӏагӏа тишъенна хин турбаш хувцаш, кердаяраш чуйоахкаш. Деррига балхаш чакхдоахаргда 2030 шера, бакъда цу гӏулакха дӏадаха деза ахча цахаддаш хила деза федеральни оагӏорахьара.
