Наха зуламаш дара духьалара болх дӀахьош ба росгвардейцаш
Экстремизм яхача доккхача зулама духьала къовсам лоаттабеш, болх дӀахьош ба республикерча Росгварде болхлой. Мехкарча студенташта лекци еша баха хилар уж укх деношка. Из хоам «Сердалога» бир цу моттигера.
«Иштта йолча кхетаченашка кагирхошта дувц, интернете гӀолла цу бӀехача гӀулакха нах тӀахьехаш лелабеча балхах. Кагирхой сакхетам тувлбеш, зуламхоша леладеча наькъех дийцар цига. Цу доккхача зуламах мишта лорабала беза; малагӀа уйлаш, нигат долаш ваха веза бусалба саг хьалхадаьккхар кагирхошта», - дийцар тха газетага.
«ТӀехьарча шерашка ма хулла дукхагӀа кагирхой цу харцача наькъ тӀа баха гӀерташ, интернете гӀолла болх лелабу зуламхоша. Массахана фийла волаш; тувлбенна леларашца бувзаме ца вувлаш; ше, шийна безараш, бовзараш лорабе хьожаш; хила веза саг», - белгалдир полице майор волча Исмейланаькъан Аслана.
