Терроризма духьалара кхетаче дӀайихьар республикерча Росгварде, «Хьалхарчар болам» яхача оагӀонца
14.02.2025 11:27
Терроризм яхача зулама духьала лоаттабе безача къовсамах дувцаш, кхетаче дӀайихьар кагирхошца Росгварде, «Хьалхарчар болам» яхача оагӀонца. Из хоам «Сердалога» бир цу моттигера.
«№ 2 йолча къаман гварде ишколе дӀайихьар кхетаче. Таханарча хана даьржача зуламашта духьаллаттар мишта хила деза дийцар Росгварде кулгалхочун гӀонча волча Исмаилов Аслана, «Хьалхарчар болам» яхача оагӀон кулгалхочун гӀончас Пхьошанаькъан Зоврбика, дешара моттига кулгал деча Чаненаькъан ПаьтӀамата», - йоах хоамо.
Наха юкъе харцахьара наькъаш доаржадеш болча зуламхошца фийла хила везилга белгалдир кхетаче.
«Иштта дӀакхухьаш болча балхо дукха хӀама довзийт кхувш латтарашта. Дикка къахьегаш дӀакхахьа безаш болх ба из тахан», - аьлар милице майор волча Исмаилов Аслана.
