ГӀалгӀайчера тока оагӀув тоабеча, 29 млн сом хьожадергда Россеташа
МагӀалбика кхален моттигашкара 6 Кв йола тока оагӀув меттабоалабу болх дӀаболабаьб «Къилбаседа Кавказа Россеташа»- «Ингушэнергос». 29 млн сом ахча да цу гӀулакха хьахьожадаьр.
1973-ча шера денз; Дола-Коа, Инаркъе, цхьацца йолча моттигашка: шин ишкола, 6000 эзар совгӀа бахархошта, берий беша, хин станцена - ток лоаттаеш я из.
Бувца оагӀув тоабе безача хьале кхаьча дикка ха яр. Тока саьргаш тишденнад, тока бӀоагӀаш лийлха, юкъера арматура мукхйиа латта дукха ха я. Из бахьан долаш, ток а боаггӀача боараме дӀа-хьа кхачац наха.
105 аьшкабетона бӀоагӀа богӀаргба цига, 26 км кхоачаш тиша тока саьргаш хувцаргда. ДикагӀа лоархӀаш дола СИПаш моллагӀча хаоттама духьалаъ отталуш, гӀор йолча хана ша ца беш, ханахьа тиша ца луш хургда.
Иштта 483 «пелаш», хӀама чӀоагӀду аьшка гомаш, арматураш хувцаш къахьегаргда цига.
«Цу лоархӀамеча проекта дикка аттача доаккхаргда тока оагӀон хьал. Массахана цхьацца кхоачамбоацараш лаьтта тока моттиг меттайоагӀаргья, ток а боаггӀача боараме дӀа-хьа кхоачаш хургья», - дийцар тхога «Ингушэнерго» филиала кулгалхочун декхараш кхоачашдеш волча Котаганаькъан Кемрана.
Цул совгӀа, керда тока саьргаш, моллагӀа хатар хилча, вожаш санна кхераме дац наха, хьайбашта. Ер шу йистедалалехь, чакхдаха лерхӀ цигара деррига балхаш.
