Россеташа Гӏалгӏайчен дешархошта бовзийтар подстанце болх
«Къилбаседа Кавказа Россетий» - «Ингушэнерго» филиала болхлоша, Гӏажарий-Юртарча №5 йолча ишколан ийслагӏча класса дешархошта экскурси йир 35/10 кВ «Котиева» подстанце.
Белгалду, 2020 шера Сийлахь- боккхача тӏем тӏа Котало яьккха 75-гӏа шу долаш, «Къилбаседа Кавказа Россеташа» майора Котанаькъан Хьамида цӏи елар Шолжа кхален подстанцена, цо ӏалашъю токаца Алхасте, Гӏажарий-Юрт, Берда-Юрт, Арште, Чамалха.
Подстанцерча болхлоша Горчхананаькъан Мухьмада, Пхьугой Амната дийцар берашта из моттиг хьалъярах, цига болх беш дола довзийтар, иштта Бийбота Хьамида вахара наькъах дийцар.
Котанаькъан Хьамид ваь хиннав 1904 шера Мужеча. Дийтта шу даьлча из вахар, ший лоӏаме волаш, Цӏеча эскаре. Цул тӏехьагӏа красноармейцах Котанаькъанчох хилар кадрови эпсар, Краснодарски кавалерийски ишколе дукха хӏама ӏомадир цо, дийшар СКВО куран тӏема политический ишколе.
1938 шера денз, Сийлахь-боккха Даьймехка тӏом чакхбаллалца Бийбота Хьамида дика дӏахьу ший амал Георгиевск шахьара военкомата комиссар волаш, къасттача эскадрила командир волаш. Къаьсттача эскара тоабан хьем боацача даькъа командир, бӏухой полка командира гӏонча волаш.
Котанаькъан Хьамида дукхаза дакъа лаьцар тӏемашка, шозза йоккха човнаш а йир цунна, бакъда из тӏем тӏара юхаваргволаш вацар, дарба даьчул тӏехьагӏа из юхавода тӏема мугӏарашка, из тӏем тӏа хул Сийлахь-боккха Даьймехка тӏом чакхбаллалца.
Дукха тӏема совгӏаташ да денна хиннад цунна. «Денал гойтарах» майдилг; Цӏеча Байракха, Цӏеча Седкъан» орденаш. Прага йоаккхаш Котанаькъан Хьамида Чехословаке тӏема лакхара совгӏат делар - «Чехословаке жӏарг».
Тахан вайца вац Бийбота Хьамид, бакъда вай баркал оал цо Сийлахь- боккхача Даьймехка тӏом латташ гойтача турпалча гӏулакхех. Тӏема доакъашхошта карагӏдаьннар дицдаь ха йоагӏаргьяц», - аьлар ток лоаттаерий инженера Пхьугой Амната.
Юххера а, экскурси чакхйоалаш, токацара хьал лорадара, кхерамзле лелаяра хетаяь урок елар, берашта довзийтар цу даькъ тӏара балхаш, керттера бокъонаш, технологеш, шоай вахаре, урамашка токаца мишта хила беза хьалхадаьккхар.
