«Россеташа» Наьсаре болх бу, токах дола ахча хьадоаккхаш
«Къилбаседа Кавказа» Россетий - «Ингушэнерго» филиала болхлоша, шоашта керте Наьсарен-Шахьара ток йохкара даькъа кулгалхо Малсаганаькъан Казбек а волаш, рейд дӏайихьар Наьсарерча Орджоникидзе урамах. Энергетикех хьакхийтар «Магас» телерадиокомпане корреспонденташ.
Цхьана из болх дӏахьош 101, 5 эзар сом декхар хьаделар, иштта шин чӏоагӏонна кулгаш яздир 340 эзар сома эргало ю балхаш дергдолаш. 18 сага электроэнерги дӏа ца луш дола хьал къоастадир.
Уж рейдаш дӏахьош я нахагара ӏаьдала декхар хьадаккхара, царна из лоархӏаме хаттар долга дӏахайтара.
Энергетикаша, урамах бахача наха хьалхадаьккхар декхар хьалуш цахиларах бехктокхаме оттавеш хилар, цул совгӏа довзийтар шийгара тока саьрг дӏахоттар кхераме долга.
«Дӏахо а цу тайпара болх дӏабахьа лерхӏ, нахага доалла ӏаьдала декхар хьадаккхара. Беррига болх дӏахьош ба латташ долча законага хьежжа. Мах хьалуш хиларга хьежжа мара дӏабодац энергомоттигаш тоаяра даькъ тӏа беш бола болх. Энергетикаша кхерамзле йолаш а тешшаме а токаца ӏалашо лоаттаю урхалленашка, заводашка, предприятешка шоай ханнахьа», - аьлар «Ингушэнерго» филиала кулгалхочо Котаганаькъан Кимрана. Цу тайпара рейдаш дӏахо дӏахьргья Наьсаре.
Хьалхадоаккх, ток лелаярах бола мах дӏабала йиш я «Онлайн Свет» яхача мобильни оагӏонга гӏолла, иштта «Доалахьара кабинета чура» мугӏарерча компане сайта тӏа, моллагӏча кхыча декхар дӏадалара йолча пункташка.
Нагахьа санна шийна цхьацца долча бахьанех декхар дӏадала ца могаш абонент вале, из ваха веза моттигерча энергетикий даькъе, царца ший декхара хаттар дувца.
