Гаьнна лоамашка ядача юрташкара тока хьал тоадергда Россеташа
Шолжа кхален кхаь километрах латтача доазон тӏара 10 Кв тока оагӏув дехьайоаккхаш, болх дӏахьош латт Россеташа. 40 километрага кхоачаш я цун еррига моттиг. Гӏажарий-Юрта, Берда-Юрта, Чамалха, Арште ток лоаттаю цо. Листта хьалъэтта латтача хьун боахама тӏагӏолла, иштта Эса лакхегӏолла дӏадолхаш да цун саьргаш. Хаоттам телха болх хилча, гаьний ткъоврош ӏотӏалегаш, лоа тӏалеташ хиларах хатараш хиннад цига. Хӏаьта тока саьргаш сихха болх дӏабахьа аьттув боацача доазон тӏа хиларах, чоалхане дерзар гӏулакх.
«Укх бетта 14-ча дийнахьа нийсделар цу тайпара хатар: Геттара чӏоагӏа догӏа, мух хиларах хаьда саьргаш меттаоттаде аьттув баьлар тха, цу лакхе хьоахаяьча юрташкара дӏа мел йолча моттигашка. ӏотӏадоагӏача догӏах хьун юкъе болх беш баьхкар цу оагӏонцара къахьегамхой бӏарчча бийсан. Дувцилга доацаш, чӏоагӏа низткъача хьалера болх хилар цох, тока саьргаш халача моттиге гӏолла долхаш хиларах. Из бахьан долаш, болх дӏабахьа аттагӏа хургдолчахьа дӏадехьаяккха лаьрхӏад из оагӏув. Моллагӏа хатар ийккха болх хуле, паргӏатагӏа хургья тока оагӏон болхлошта шоай гӏулакх чакхдаккха», - дийцар «Сердалога» «Россеташ Къилбаседа Кавказа Россеташ» - «Ингушэнерго» филиала кулгал деча Котаганаькъан ӏимрана.
Цу проектах болх дӏахьош, 54 тока бӏоагӏа богӏаргба; 7,3 километрага кхоачаш дикагӏа лоархӏаш бола (СИП), моллагӏча хаоттамах талхаш боаца, гаьний ткъоврош ӏотӏалийгача а кхераме боаца, дӏахьокхавелча ток тохаш боаца тока саьрг хургба цига.
«Кхоачамбоацараш нийслу дукха ха я. Хаоттам телха болх хилча, ток йоацаш дусар тхо. Тока оагӏон болхлой сиха хьакхоачар, бакъда болх дикка гаьнабоалар, тӏаваха хала моттиг хиларах.
Сона сайна бӏаргадайнад, даггара ӏотӏадоагӏаш догӏа долаш, баьдеча бус ток дӏайовра бахьан лехаш, уж сахиллалца боахкаш. Чӏоагӏа гӏаддаха да тхо из гӏулакх хӏанз аттача даьнна», - дийцар Берда-Юрта вахача Гадаборшанаькъан Мухьмада. Шолжа кхален тока оагӏонцара болхлой ба из проект дӏахьораш. Керттерча инженера Осканаькъан Мухьмада кулгал деш, 10 болхло ва цига къахьегараш. Ер кӏира чакхдалале, йистебала лерхӏ цар.
