Ток лечкъаеш хинна гӀулакх соцадир «Къилбаседа Кавказа Россеташ» яхача оагӀон болхлоша
«Къилбаседа Кавказа Россеташ» - «Ингушэнерго» яхача филиало Ӏаьдала болхлошца майнинге гӀолла геттара дукха ток лечкъаеш хинна моттиг гучаяьккхар.
Рейд дӀаяхьа арабаьннача болхлошта гучадаьлар из хӀама Сурхо тӀа леладеш хиннилга. Хьайбаш леладеча ферме 100 Ква, 80 киловатт низ бола трансформатор оттабаь хиннаб, хӀаьта цу сага ше из хийцаб 400 Ква, 300 киловатт ток телача трасформатораца.
Криптовалюта лаьрхӀа хинна гӀирсаш массайолча оагӀорахьара къайла, наӀараш йоацаш долча отара кӀалха латташ хиннад. Ток мел йоаяьй хьахьокхаш болча гӀирсаца дӀахетта хиннадац вожаш. Деррига дӀалаьрхӀача, бархӀ миллион киловатт-сахьат да цар, ток лечкъаеш, дӀаэзараш.
Республикерча клинически дарбанче пхе шера йоаеш йола ток я из, лархӀа эттача. Бокъо йоацаш ток йоаеш, тока оагӀон моттигашта зе дераш гучабоахаш болх ба мехка дӀахьош.
«Ингушэнерго» яхача филиало майнинг-фермаш гучайоахаш къахьег тахан. Из гӀулакх бахьан долаш тока оагӀон моттигашка хатараш хул, ток наха боаггӀача боараме дӀакхачац, боарам боацаш боккха низ ба токацарча гӀирсашта тӀалаттар.
Иштта дола хӀама леладу моттиг гучаяьлча, Ӏалаьмате чехка телефон дӀатоха еза Ӏаьдалга укх номерах: 8 800 220 02 20 (24 сахьата мах боацаш болх беш я телефон, техар къайлахьоргва).
Россе Паччахьалкхено 2025-ча шерарча Наджгоанцхой бетта 1-ча денгара 2031-ча шерарча тушола бетта 15-ча денга кхаччалца, майнинга бокъо йийхкай Россе 10 мехка, цу юкъе я вай республика а.
