850 млн сом мах бола майнинг-къоал дар гучадаьккхар Россеташа 2025-ча шера
«Къилбаседа Кавказа Россетий» - «Ингушэнерго» яхача филиала болхлоша ток лечкъаеш йола 17 майнинг-ферма гучаяьккхар 2025-ча шера. Цу оагӏонца лечкъаяь ток 82,2 млн киловатт- сахьат да. Ма дарра аьлча, йоккхача шахьаре Наьсаре ах шера йоаеш йола ток я из, хӏаьта ахчанга диллача тока оагӏона 850 млн сом зе даьд из хӏама леладаьраша.
Дӏабихьача балхах 351, 7 млн сома ток лечкъаеш хинна кхо моттиг гучаяьлар Наьсарен кхален моттигашка; 172, 6 млн сома ток лечкъаеш хинна кхо моттиг Магӏалбика кхален юрташкара гучаяьлар; 119, 7 млн сома ток лечкъаяьй Наьсаре; 114,6, 79,4 млн сома ток юаш хинна ши майнинг-ферма Шолжа шахьаре, Илдарха-Гӏалий тӏа гучаяьлар; цхьаькха, 5,9 млн сом зе даьр - Магӏалбике. 4,7 млн сома ток лечкъаяь кхо моттиг Магасе гучаяьлар, 99 эзар сома ток йиа моттиг я Шолжа кхале. Эггара дукхагӏа зе даь моттиг Тӏой-Юрта гучаяьккхар.
129, 9 млн сом мах бола ӏаьдала ток лечкъаяьй цу наха. Рейд дӏаяхьа араяьннача тоабо гучадаьккхачох, саг вахаш воацача цӏагӏа, цӏен подвала чу хинна майнинг-ферма мобильни бувзамах йолча вышка ток лоаттаеш болча трансформаторах 100 метр 10 Кв кабель дӏахетта, 1 ООО Ква трансформаторни подстанци ӏойилла хиннай. Массанахьа хьежача болхлоша 264 майнинг-фермай гӏирсаш хьалехар. Кхоачамбоацараш хинна моттигаш юкъелоацаш, лоткъамаш оттадаьд, царех дар ӏаьдалга дӏачуденнад тахан. Йиъ моттига духьала гӏулакх хьадийллад карарча хана.
«Къилбаседа Кавказа Россеташ» яхача моттига болхлоша ток лечкъаеш бараш гучабоахаш, тахан дӏахьош бар боккха болх ба. Цул совгӏа, из хӏама леладераша кхерамеча хьале оттабу шоашта гонахьа бахараш. Ток лечкъаеш моттиг гучаяьлча, 8 963 172 88 44 номерах хоам бар дех «Ингушэнерго» болхлоша. Хоам баь саг къайлахьоргва. 2025 шера тушоле бетта 15-ча дийнахьа денз 2031-ча шерга кхаччалца, майнинг лелае йиш йоаца моттигаш къоастаяьй Россе Паччахьалкхено, вай мохк цу юкъе ба.
