Тахан вай мехкарча ишколашка хьалхарча классе деша дахар 8 эзар совгӀа бер
Ишколан коа чудоалаш, хьалхара гӀа баьккхар тахан 8 200 бера. Мехкарча 159 ишколо шоай наӀараш хьайийллар 85 эзар совгӀа дешархо тӀаэцаш. Дешара шу дӀадоладаларца даькъалабийцар уж вай мехкадас Келаматанаькъан Махьмуд-Ӏаьлас. Къаьстта терко йир мехка кулгалхочо ишколе эггара хьалха дӀачубоалачарна.
«Тахан, дешарца дувзаденна вахар довзаш эггара хьалхара гӀа боаккхаш да шо. Шун дешарцарча безамга, лоархӀамга хьежжа хургда ГӀалгӀайчен кхоанара вахар», - белгалдир мехкадас. Республикан кулгалхочо теркалдир, вай мехкá лакха начӀал, говзал, кхетам бола нах эшилга; Ӏилман, унахцӀенон оагӀошцара, культуран хьал тоаде, доаржаде къаман юкъе шоай гӀулакх дика довзаш бола говзанчаш безилга.
«Аз даькъаладувц шо дешара шу дӀадоладаларца! Беркате хилда ер дешара шу; дешархошта, студенташта санна; хьехархошта, берий даьшта, ноаношта. Дика дешаш дӀачакхбала аьттув хилба дешархой; хьехархой низ хилба сабарца, боаггӀача боараме шоай болх дӀабахьа; хӀаьта даьй, ноаной дегаш гӀадкхувлалда берий толамаша», - белгалдир вай Мехкадас ший къамаьла юкъе.
