Вай къаман ворхӀ проект чуйоагӀа «баьццарча даькъа», вешта аьлча, ахчанца хьаллацара
Россе ахчан министерствос баьча балха мах оттабарга диллача, ГӀалгӀайче «баьццарча даькъа» чуйоагӀа ворхӀ къаман проект, кассе гӀолла чакхдоалача ахчанца хьаллаьца хиларах. Царна юкъе я «Халкъашта юкъера коопераци, экспорт», «ЗӀамига, юкъера предпринимательство», «Экологи», «Кхерам боаца машена наькъаш», «Дешар», «Культура», «УнахцӀено».
«Итт проектах, ахча дӀадохийташ йола ворхӀ проект «баьццарча даькъ тӀа» я, дӀадахар нийса дӀахьожадаь хиларах. Бакъда даьхача толамаш тӀа совца йиш яц, цудухьа дӀахо соца ца беш, из болх дӀабахьа беза къаман проекташ кхоачашъяра. Хьахьожадаьча ахчах де доагӀаш дола балхаш хьа ца деш, толам баккхара тӀа ца кхувш дола боахамаш сиха йистедала деза, шоаш тӀаийца декхараш йиллача хана кхоачашдаь. Россе ахчан министерствос вай хьадаь даьннача балхашта оттабаь мах, дӀахо а из иштта хьабара вай дог айдеш ба, дӀахо а экономика, экологи, дешар, унахцӀено, кхыдола ГӀалгӀайчен вахара доакъош тоадара.
Къаман проекташ кхоачашъяр - из мехка керттера декхар да. Хьокхамаш дика хилар вай массазара декхар хинна дӀаотта деза, хӀана аьлча цо таро лургья вай республикан таронаш тоае», - аьлар ГӀалгӀайчен Кулгалхочо Келаматанаькъан Махьмуд-Ӏаьлас, цу даькъ тӀа даьха толамаш ше дувцаш. Карарча шера ГӀалгӀайче хьалъе лаьрхӀадар, къаман проекта чуйоагӀаш, 65 паччахьалкхен гӀишло. Царга дӀадодар, юкъера дӀалаьрхӀача, 8,5 млрд сом дар. Цу объекташта юкъейодаш я 11 дешарца ювзаенна моттиг, уж лаьрхӀа я 6 458 сагá. Царел совгӀа, хьалъяь дӀачуяла лерхӀаш я массехк унахцӀенон гӀишло. Цу юкъе я ТӀой-Юртара дарбанче, иштта Сурхо тӀара, Южнера амбулатореш.
