ГӀалгӀай паччахьалкхен 100 шу дизара хетадаь, байнача тӀема доакъашхой дезалашта гӀо дергда
ГӀалгӀай паччахьалкхен 100 шу дизарца дувзадаь, тӀема операцена юкъе вахар хаьдача бӀухой дезалашта кхачан тӀормигаш декъаргда. Из хоам «Сердалога» бир паччахьалкхен зарбан болх лелабераша.
Россе Герзашцарча низах йолча Министерствон доакъашхой, Россе къаман гварде оагӀон болхлой дезалашта гӀо дергда. Цу гӀулакха хьалхаэттар ва вай мехкада Келаматанаькъан Махьмуд-Ӏаьла. Шекар, хьоар, дуга, даьтта, гарзаш, чай, печенеш, конфеташ, шура, иштта кхыбола кхача хургба тӀормигашка. Уж дӀадекъара гӀулакх администрацешта тӀадиллад.
«ТӀема доакъашхой дезалашта новкъостал лоаттадар, вай лоархӀаме декхар да тахан. Паччахьалкхен 100 шу дизар цхьанкхетарца, юкъера барт, безам чӀоагӀбарца дувзаденна хила деза къаьстта тахан, вай къаман къонгаш Даьхен моттиг лораеш латтача хана. Турпалаша хьабена никъ, шоай Даьхе лоархӀаш уж лаьтта хилар дицде йиш яц вай цӀаккха а. Вай керттерча декхарех да, цар дезалашта гӀо лоаттадар, терко яр», - белгалдир республикан кулгалхочо.
Укх бетта 26-ча, 27-ча деношка дӀадекъаргда сагӀа.
