«Сердалос» керда вахар делар гӀалгӀай меттá, Microsoft Word оагӀонца
«Сердало» яхача кепайоазон ЦӀено гӀалгӀай мотт боаржабара тӀехьа дикка гӀа боаккхаш, Microsoft Wordа лаьрхӀа орфографех долча дошлорга керда оагӀув арахийцар.
Цу кердача балхо чулаьцад дуккхача хана денз наха сатийсараш, хьийжараш. ГӀалгӀай меттала яздерашта дикка оатто еш болх ба из. Эггара лоархӀамеча керттердарех да аьнна белгалдир клавиатура юкъе шоллагӀа хьарак "ӏ" (юникод 04CF) оттадар. Алапата кхыдола алапаш санна латташ хургда из а. ГӀалгӀай меттала яздара болх дикка аттачахьа боаккх цо, кхыдола алап леха, юкъеувттаде ца дезаш. Цул совгӀа, «Сердало» из болх дӀабихьараша дошлорга юкъе деша формаш оттаяьй, из бахьан долаш, яздеча хӀаман юкъера гӀалаташ хувца аьттув ба.
«Болх дӀаболабеча хана Microsoft Wordе цхьацца халонаш нийсъелар тхона; бакъда, дог ца эккхаш, хьинаре къахьегарах; деррига кхоачамбоацараш тӀехьашка дисар. Тахан, дега боккха тоам хулаш, бовзийт оаха программан керда оагӀув. Дошлорг ше кердача хьисапе хьаэттадеце, из хьачудаккха йиш я «Сердало» сайта «Дошлорг» яхача оагӀон тӀара»,- дийцар из боккха, лоархӀаме болх вӀашагӀболлаш ди-бийса ца къовсаш къахьегаш хьавоагӀача Курскенаькъан ИбрахӀима. Белгалде деза, MIicrosoft Wordа лаьрхӀа «Сердало» орфографически дошлорга хьалхара оагӀув 2023-ча шерарча наджгоанцхой бетта арахийцалга.
Цу хана денз дуккханешта атто еш да из гӀулакх, из хьагойт 4 эзар совгӀа сага цох пайда эцаш хиларо. Таьрахьашца дувзаденнараш даржаш латтача заман чухьа; гӀалгӀай мотт лорабеш, тоабеш бола боккха, лоархӀаме болх ба «Сердало» кепайоазон ЦӀено, дошлорг кердадоаккхаш дӀабихьар.
Болх дикка къахьегаш дӀабахьаро дуккхача наьха гӀалгӀай меттала яздара хьал тоадаьд. Кепайоазон цӀен «Сердало» сайтага гӀолла хьачудаккха йиш йолаш да тахан дошлорг. Цу оагӀонцара болх дикка тоабеш дӀахьош латт; наьна мотт безаш, лорабеш, лоархӀаш болча бахархой хьал аттача доаккхаш.
