ТӀоговзанчий-гӀишлош меттаоттаерий ишколо вай мехка 50 пхьар кийчвир
«ТӀехьале» яхача тӀоговзанчий-гӀишлош меттаоттаерий ишколо 50 къона пхьар Ӏомавир. Укх деношка арахийцар йиълагӀа тоаба. Тха газетага из хоам Мехкадаь зарбан болх лелабераша бир.
Кхаь-биъ бетта дешаш хиннача студенташа шаьръяьй ворхӀ оагӀонцара говзал, цу юкъе я археологи, баткъа боттар (маркхал боацаш болх бар), халкъашта юкъера ЮНЕСКО бокъо. ТӀеххьара экзамен дӀалуш, тӀох пен хьалботта безаш бар студенташ.
«Вай даьшкара кхаьча гӀалаш меттаоттаеш боккха болх дӀабахьа безаш ба ЖӀайрахьа кхалерча Лохера Пхьуй яхача историко-архитектурни моттиге дешар чакхдаьккха къонабараш», - белгалдир вай мехкадас Келаматанаькъан Махьмуд-Ӏаьлас. Республикан кулгалхочо теркалдир, лоамара тӀох яь гӀалаш меттаоттаяр вай мехка хьалхашка латтача керттерча декхарех долга.
Цунга хьежжа, къона говзанчаш хилар, уж Ӏомабеш болх чакхбаккхар мехка чӀоагӀа лоархӀаме да. «ТӀехьале» яхача ишколо тахан дикка йоаржаеш латт ший дешара программаш, цу юкъе да дахчанца, кхераца болх бар, арт-гӀишлош хьакхоллар, товгӀаш меттаоттаяр.
